ەل تاريحىندا تۇڭعىش رەت سامماري جانە non-fiction كىتاپتاردى شىعارىپ، الەمدىك بەستسەللەر كىتاپتاردى قازاق تىلىندە سويلەتكەن «Mazmundama» باسپاسى از ۋاقىت ىشىندە بەدەل جيناپ، قالىڭ وقىرماننىڭ كوزايىمىنا اينالدى. قازاق ءتىلىنىڭ مازمۇنىن دامىتۋ ارقىلى ۇلتتىڭ بولاشاعىنا قىزمەت ەتەمىز دەپ الدىنا زور ماقسات قويىپ، وسى كۇنگە دەيىن ءبىراز بەلەستەردى باعىندىرىپ ۇلگەرگەن «Mazmundama» قوعامدىق قورىنىڭ جەتەكشىسى، الەۋمەتتىك كاسىپكەر - تەڭىز سەيىلحانمەن سۇحباتتاسۋدىڭ ءساتى ءتۇستى.
- “اۋدارما سالاسىمەن اينالىسىپ، قازاق نارىعىنا الەمدىك بەستسەللەر كىتاپتاردى شىعارامىن” - دەپ، بۇل ءىستى قولعا الۋلارىڭىزعا نە تۇرتكى بولدى؟ مۇنداي شەشىمگە قالاي كەلدىڭىزدەر؟
«MAZMUNDAMA» جوباسى 2016 جىلى اقش-تا ىسكە قوسىلدى
- «Mazmundama» جوباسى 2016 جىلى امەريكا قۇراما شتاتتارىندا باستاۋ الدى. نەگىزىن قالاۋشى گارۆارد ۋنيۆەرسيتەتىنىڭ تۇلەگى شىڭعىس مۇقان.
- باعدارلاما بويىنشا جانە باعدارلامادان تىس كوپتەگەن كىتاپتار وقىدىق. وقۋ كەزىندە جاڭا جانە قىزىقتى نارسەنى بىلگەن سايىن ماڭىزدى اقپاراتتاردى باسقالارعا بولىسكىمىز كەلدى. جىل سايىن الەمدە ەكى ميلليونعا جۋىق كىتاپ شىعارىلادى. تانىمال تانىمدىق ادەبيەتتى قازاق تىلىنە اۋدارۋدىڭ ءداستۇرلى نۇسقالارىن شىعارۋدى ارماندادىق. وسىلايشا، دوستارىمىزبەن كەڭەسىپ سامماري كىتاپتارىن قۇراستىرۋعا شەشىم قابىلدادىق.
قازاق ءتىلىنىڭ مازمۇنىن دامىتىپ، ۇلتتىڭ بولاشاعىنا قىزمەت ەتەمىز
- مازمۇندامانىڭ ميسسياسى - قازاق ءتىلىنىڭ مازمۇنىن دامىتۋ ارقىلى ۇلتتىڭ بولاشاعىنا قىزمەت ەتۋ.
- ادام ساناسىنىڭ دامۋى ساپالى اقپاراتقا بايلانىستى دەسەك، مازمۇندامانىڭ باستى قىزمەتتەرىنىڭ ءبىرى - ادامزات دانالىعى مەن ءبىلىمىن قازاقشاعا اۋدارۋ ارقىلى وسكەلەڭ ۇرپاقتى ءبىلىمدى ەتۋ. ەڭ العاشقى جوبامىز - «وقۋعا ءتيىس 10 كىتاپ» دەپ اتالادى. ەڭ قىزىقتى جانە وزەكتى تاڭداۋدى قالاي تاڭدادىق؟ ءبىز (Good Reads, New York Times, Amazon) ساراپشىلارىنىڭ جانە (Harvard Business Review, Forbes) وقىرماندارىنىڭ پىكىرلەرىنە جۇگىنىپ، «كوشباسشىلىق» تاقىرىبى بويىنشا ۇزدىك 10 كىتاپتىڭ رەيتينگىن جاسادىق. 4 جىل ىشىندە «وقۋعا ءتيىس 10 كىتاپ» جوباسى اياسىندا كەلەسى 9 كىتاپتى شىعاردىق: كوشباسشىلىق، مەنەدجمەنت، كەمەلدەنۋ، وتباسى، تاربيە، ماركەتينگ، تابىس، دەنساۋلىق، بايلىق. بۇگىندە ەكونوميكا، كەلىسسوز، ساياسات، بولاشاق تاقىرىپتارىنداعى كىتاپتار ازىرلەنۋ ۇستىندە. قازاقستان تاريحىندا تۇڭعىش رەت سامماري جانە non-fiction كىتاپتاردى «Mazmundama» باسپا ءۇيى شىعارعانىن اتاپ وتكىم كەلەدى.
- تەڭىز سەيىلحاننىڭ باسپا ىسىمەن اينالىسقانعا دەيىنگى ءومىرى قانداي بولدى؟ كاسىپكەرلىككە قالاي كەلدىڭىز؟
قاراپايىم اۋىلدان شىعىپ، شەتەلدە ءبىلىم الدىم
- وڭتۇستىك قازاقستاندا، قازىرگى تۇركىستان وبلىسىنىڭ شاردارا قالاسىندا دۇنيەگە كەلدىم.
- اۋىلداعى قاراپايىم قازاق مەكتەبىن ءبىتىردىم. مەنىڭ جانە مەكتەپتەگى جولداستارىمنىڭ الدىندا ەكى تاڭداۋ تۇردى: 1) اۋىلدا قالۋ. سودان كەيىن ۇيلەنىپ، سول جەردە جۇمىس ىستەۋ. 2) ۇلكەن قالاعا وقۋعا ءتۇسىپ، بولاشاققا قادام جاساۋ. مەن ەكىنشى جولدى تاڭدادىم. مەكتەپتى اياقتاعاننان كەيىن مالايزياعا اعىلشىن ءتىلىن ۇيرەنۋگە اتتاندىم. 6 اي ازيا-تىنىق مۇحيتى تەحنولوگيالار جانە يننوۆاتسيالار ۋنيۆەرسيتەتىنە قاراستى مەكتەپتە اعىلشىن ءتىلىن وقىدىم. 2013 جىلى الماتىعا كەلىپ، قانىش ساتباەۆ اتىنداعى قازاق ۇلتتىق ۋنيۆەرسيتەتىندە ينفورماتيكا ماماندىعىندا وقىدىم.
ونلاين پلاتفورمالاردى دامىتىپ، دەرەكتەردى قالپىنا كەلتىردىم
- ستۋدەنت كەزىمدە ءبىلىم سالاسى قىزىق بولاتىن.
- ءسويتىپ، راۋان كەنجەحانۇلى باسقاراتىن «Bilim Media Group» كومپانياسىنا كونتەنت مەنەدجەر بولىپ جۇمىسقا ورنالاستىم. 6 اي ىشىندە كوپتەگەن جوبالارمەن جۇمىس ىستەدىم، ايتا كەتسەم Bilimland.kz, iTest.kz, iMektep.kz. مەنىڭ مىندەتىمە ايتىلعان پلاتفورمالاردىڭ كونتەنتىن دامىتۋ كىردى. كوپ تاجىريبە الدىم. 2017 جىلى ەلورداعا كەلىپ، استانا حالىقارالىق قارجى ورتالىعىندا IT مامان بولىپ ءبىر جىلداي قىزمەتتە ىستەدىم. 2018 جىلى قازپوشتادان دەرەكتەردى باسقارۋ دەپارتامەنتىنەن شاقىرۋ كەلىپ، قازاقستان بويىنشا 22 مىڭ ادام ىستەيتىن مەكەمەنىڭ ميلليونداعان دەرەكتەرىن قالىپقا كەلتىرۋمەن اينالىستىق.
IT سالاسىنا 5 جىلىمدى ارنادىم
- دەرەكتەردىڭ دۇرىستىعىنا بايلانىستى دۇرىس شەشىم قابىلدانادى.
- دەرەكتەردى باسقارۋدى جۇيەلەپ، جۇمىسى جولعا قويىلعاننان كەيىن، نازارباەۆ زياتكەرلىك مەكتەپتەرىنە قاراستى «پەداگوگيكالىق ولشەۋلەر ورتالىعىنان» شاقىرۋ كەلدى. ءدال وسى جىلى 2018 جىلدىڭ سوڭىندا «Mazmundama» دۇنيەگە كەلدى. «Mazmundama-عا» قوعامدىق جۇمىس رەتىندە قارادىم، كەشكە دەيىن نيش-تىڭ جۇمىسىن، كەشتەن ءتۇن ورتاسىنا دەيىن دەمالىس كۇندەرى جانىما جاقىن «Mazmundama» جۇمىستارىن ىستەپ ءجۇردىم، وسىلاي ارادا ءبىراز جىل ءوتتى. IT سالاسىندا 5 جىلداي جۇمىس ىستەدىم.
- باسپا ءۇيىنىڭ اتاۋىن نەگە “Mazmundama” دەپ قويدىڭىزدار؟ وزگە باسپا ۇيلەرىنەن باستى ەرەكشەلىكتەرىڭىز نەدە؟
قازاق ءتىلدى كونتەنتتى بايىتۋ باستى مىندەتىمىز
- مازمۇنداما قوعامدىق قور بولىپ قۇرىلعان كەزدە مازمۇن دەگەن ءسوز اعىلشىنشا كونتەنت - قازاق تىلىندە كونتەنتتى دامىتۋ جانە بايىتۋ.
- مازمۇنداما قوعامدىق قورىنىڭ ميسسياسى باسقا باسپا ۇيلەرىنەن باسقاشا. "Mazmundama" – كوممەرتسيالىق ۇيىم ەمەس، قوعامدىق ۇيىم. قازاق ءتىلدى كونتەنتتى بايىتۋدى ءوزىمىزدىڭ باستى مىندەتىمىز دەپ سانايمىز. ۇلتتىڭ باسەكەگە قابىلەتتىلىگى ءار ادامعا بايلانىستى. ال ءار ادامنىڭ باسەكەگە قابىلەتتىلىگى ونىڭ تىلىنە بايلانىستى. ءتىلدىڭ باسەكەگە قابىلەتتىلىگى سول ءتىلدىڭ مازمۇنىنا بايلانىستى. ءبىز قازاق ءتىلىن جان-جاقتى ناسيحاتتاۋعا ءوز ۇلەسىمىزدى قوسىپ، جاستارىمىزعا زامانىنا لايىق، زاماناۋي ءبىلىم الۋىنا كومەكتەسكىمىز كەلەدى.
- “Mazmundama” باسپاسى كوبىنە قانداي ادەبيەتتەردى اۋدارۋمەن اينالىسادى؟ مىسالى «50% — بيزنەس، موتيۆاتسيا، 30% — كوركەم ادەبيەت، 20% — بالالار ادەبيەتى» دەگەندەي بەلگىلى ءبىر ەرەجەگە سۇيەنەسىزدەر مە؟
ۇزدىك كىتاپتاردى قازاق تىلىنە اۋدارامىز
- الەم وقىرماندارى تالاسىپ وقيتىن ۇزدىك كىتاپتاردى قازاق تىلىنە اۋدارامىز.
- Good Reads, New York Times, Amazon جانە Harvard Business Review, Forbes ەكسپەرتتەرىنىڭ رەيتىنگى بويىنشا ەڭ كوپ ساتىلعان كىتاپتار، ەڭ كوپ تىلگە اۋدارىلعان كىتاپتار. شەتەلدىڭ ەڭ الىپ باسپالارىنا كەلەتىن بولساق Penguin Random House, Simon & Schuster, ەكسمو، است بۇل باسپالار تەك قانا ءبىر جانردەگى ادەبيەتپەن شەكتەلمەي كىتاپ سالاسىنداعى بارلىق جانرداعى كىتاپتاردى شىعارادى. سول سياقتى «مازمۇنداما» قوعامدىق قورىندا وسى الىپ باسپالار سەكىلدى بارلىق جانرداعى كىتاپتاردى قامتىدىق.
«وقۋعا ءتيىس 10 كىتاپ» سەرياسى تانىمدىق ماڭىزى زور كىتاپتاردى قىسقا دا نۇسقا فورماتتا قۇندى يدەيالاردى وقىرماندارعا جەتكىزۋ ماقساتىندا جيناقتالدى. جيناقتارعا ءار سالا بويىنشا زەرتتەۋشىلەر مەن عالىمداردىڭ، الەمگە ايگىلى كاسىپكەرلەردىڭ تاڭدامالى ون كىتابىنىڭ مازمۇنى ەنەدى. ولاردىڭ بارلىعى دا ۋاقىت سىنىنان ءوتىپ، ادامزات ويىنىڭ التىن قازىناسىنا اينالعان تاڭداۋلى تۋىندىلار.
«Qazaqsha100 bestseller» سەرياسى – الەمدىك، حالىقارالىق بەستەللەرلەر. الەمدە ەڭ كوپ ساتىلعان، ەڭ كوپ تىلگە اۋدارىلعان كىتاپتار New York Times, Amazon سياقتى باسىلىمدارعا جاريالانىپ وتىرادى. وسى كىتاپتاردىڭ ىشىنەن ەڭ ۇزدىكتەرىن قازاق تىلىنە اۋدارىپ باسۋدى كوزدەيدى.
«بالالار جانە جاسوسپىرىمدەر كىتاپحاناسى» سەرياسى الەمدىك بالالار ادەبيەتىنىڭ ۇزدىك تۋىندىلارىن قازاق تىلىنە اۋدارىپ، جاس وقىرمانعا ۇسىنادى. بۇل سەريامەن شىققان كىتاپتاردى باستاۋىش سىنىپ بالالارى اتا-اناسىمەن، ال جاسوسپىرىمدەر ءوز بەتىمەن وقۋىنا بولادى.
«مەكتەپ كىتاپحاناسى» سەرياسى بويىنشا جارىق كورگەن كىتاپتار ورتا مەكتەپتەردىڭ 5–11-سىنىپ وقۋشىلارىنا ارنالعان «قازاق ادەبيەتى» وقۋلىقتارىنا تۋىندىسى ەنگەن اۆتورلاردىڭ جەكە شىعارمالار جيناعىنان تۇرادى.
«Qazaq Classics» سەرياسى قازاق تىلىندەگى كوركەم ادەبيەتكە ارنالعان. بۇل سەريامەن قازاق ادەبيەتىنىڭ كلاسسيكالىق شىعارمالارى جارىق كورەدى.
«Mazmundama Classics» سەرياسى الەمدىك كلاسسيكاعا ارنالعان باعىت. بۇل سەريا بويىنشا الەمدىك كوركەم ويدىڭ كلاسسيكاسىنا اينالعان تۋىندىلار جارىق كورەدى.
«WHO HQ» سەرياسىمەن جارىق كورەتىن كىتاپتار الەمگە بەلگىلى تۇلعالار مەن عالامدىق وقيعالار تۋرالى بىلگىسى كەلەتىن ەڭ جاس وقىرماندارعا ارنالادى. ولاردى اتا-انالار مەكتەپ جاسىنا جەتپەگەن بالالارعا وقىپ بەرۋىنە جانە باستاۋىش سىنىپتاعى وقۋشىلارمەن بىرگە وقۋىنا بولادى. بۇل سەريا اياسىندا شىعاتىن كىتاپتار بالانىڭ قيالىن شىڭداپ، بيىك ماقساتتار قويۋعا جەتەلەيدى.
- قازىرگى موتيۆاتسياعا قۇشتار Z ۇرپاق ءوزىن دامىتپاققا تالپىنىس جاساپ كەلەدى. جاستارعا ءوزىڭىز وقىعان نون-فيكشن جانرىنداعى قانداي كىتاپتى ۇسىنار ەدىڭىز؟
قازىر جاستاردىڭ بارلىعى دامۋ ۇستىندە
- ءيا، تەحنولوگيالاردىڭ اسەرىمەن زامان وتە جىلدام وزگەرىپ جاتىر. قازىر قاراپ وتىرسام، جاستاردىڭ بارلىعى دامۋ ۇستىندە. قۇر جۇرگەن ادامدى كورمەيمىن. اركىم وزىنە نە كەرەك، سول سالاداعى كىتاپتاردى وقۋى كەرەك. ءوزىم قازىر مەنەدجمەنت، ماركەتينگ، كەلىسسوز، كوشباسشىلىق، ساتۋ سالاسىنداعى كىتاپتاردى وقىپ جاتىرمىن. وزىمە ۇناعان، كىتاپتار:
- Jim Camp «Start with No. The negotiating tools that the pros don't want you to know»
- John Zenger «How to Be Exceptional: Drive Leadership Success By Magnifying Your Strengths»;
- Dave Logan «Tribal Leadership: Leveraging Natural Groups to Build a Thriving Organization»;
- Jack Welch «Winning»;
- Dale Carnegie «How to Win Friends & Influence Peoplە»;
- Jonah Berger «Contagious. Why Things Catch On».
- كىتاپ وقۋدى ادەتكە اينالدىرۋدىڭ جولدارى قانداي؟ وقىرماندارعا ايتار باستى كەڭەستەرىڭىز قانداي؟
كىتاپ وقۋ ۇلى تۇلعالارمەن كەزدەسۋگە مۇمكىندىك بەرەدى
- كىتاپ وقۋدىڭ پايداسى كوپ... ەڭ الدىمەن وي ءورىسىن وزگەرەدى، باسقاشا ويلانا باستايسىڭ، جامان ارەكەتتەرگە بارمايسىڭ، جادىڭ جاقسارادى. ءبىر كەيستى كەلتىرە كەتەيىن: كەز-كەلگەن ادام وي تاستاي الۋى قاجەت.
- مىسالى، قازىرگى تاڭدا ءاليحان بوكەيحان، اباي قۇنانبايۇلى، دىنمۇحامەد قوناەۆ، سوكرات، ستيۆ دجوبس سىندى ۇلى تۇلعالارمەن كەزدەسىپ، سۇراقتار قويىپ، سۇحباتتاسقىڭ كەلسە، ولارمەن كىتاپتارى ارقىلى قاۋىشا الاسىڭ. كىتاپ وقىعان كەزدە ادام اۋەلى وزىنە تالاپ قويا ءبىلۋى قاجەت، ءوزىن الداماۋى ءتيىس. كەمىندە كۇنىنە 1 بەت بولسىن، 10 بەت بولسىن كىتاپ وقۋ كەرەك. وسى ءادىستى كۇندەلىكتى قايتالاپ وتىرسا، ايىنا ەش قينالماي 2-3 كىتاپ وقىپ تاستاۋعا بولادى. بالكىم، قىزىعۋشىلىعىن ويانىپ 1 جىلدان كەيىن ايىنا 30 كىتاپ وقىپ كەتۋىن دە عاجاپ ەمەس. ادام قانداي كىتاپ وقىپ جاتقانىن تۇسىنبەسە، ول كىتاپتى سوڭىنا دەيىن وقىمايدى. ويتكەنى وزىنە نە كەرەك ەكەنىن دە، قانداي كىتاپ وقۋ كەرەكتىگىن دە بىلمەيدى. نەعۇرلىم كوبىرەك كىتاپ وقىساڭ، سوعۇرلىم وزىڭە پايدالى. اناليز جاساپ، وزىڭە قانداي قابىلەت جەتىسپەيتىنىن انىقتايسىڭ. سول قابىلەتتى دامىتاتىن ۇزدىك كىتاپتاردى وقي باستايسىڭ. كىتاپتى وقىپ قانا قويا سالماي، ۇناعان جەرلەردىڭ استىن سىزىپ، كىتاپتان العان ءبىلىمدى كۇندەلىكتى ءوز ومىرىڭدە قولدانا باستايسىڭ. كىتاپتىڭ ادام ومىرىنە بەرەر پايداسى شىنىمەن وراسان زور.
- الداعى جوسپارىڭىزبەن بولىسسەڭىز. بولاشاقتا “Mazmundama” وقىرماندارىن قاڭداي تىڭ باستامالارمەن قۋانتپاق؟
الاش تاقىرىبىن قايتا جاڭعىرتامىز
- جوعارىدا ايتقانىمداي قازىرگى تاڭدا 7 جوبا بويىنشا كىتاپتاردى دايىنداپ، شىعارىپ جاتىرمىز.
سونىمەن قاتار الاش تاقىرىبىن تەرەڭ زەرتتەپ، قايتا جاڭعىرتامىز. ء"اليحان بوكەيحان كىم؟", "احمەت بايتۇرسىنۇلى كىم؟", "قانىش ساتباەۆ كىم؟", "اباي قۇنانبايۇلى كىم؟" دەگەن يلليۋستراتسيالى شاعىن كىتاپتاردى بالالارعا ارنايى دايىنداۋ ۇستىندەمىز. بۇيىرسا كەلەسى جىلى ساتىلىمعا شىعادى. ارينە قازىردىڭ وزىندە قازاقتىڭ تۇلعالارىنا ارنالعان كىتاپتار بىلاي دا شىعىپ جاتىر. بىراق، ولاردىڭ بارلىعى دا ۇلكەن-ۇلكەن قالىڭ كىتاپتار... مۇقاباسى دا، ىشىندەگى ارىپتەرى دە كوزدىڭ جاۋىن المايدى. ادام وقىمايدى. نارىققا ارنالماعان كىتاپتار بولعاسىن ولار وتپەيدى. سوندىقتان وسىنداي 112 بەتتەن تۇراتىن شاعىن كىتاپتاردى شىعارۋدى باستادىق. وسى باستاما دا تاريحىمىزدا العاش رەت جاسالىپ جاتقان يگى ءىس.
ۇلى تۇلعالارىمىزدى ەل ءبىلۋى كەرەك
- مىسالى، امەريكاداعى ءىرى باسپالار نارىققا جۇمىس جاسايدى.
وسىنداي تۇلعالاردى تانىتۋمەن اينالىسادى. مىسالى، ستيۆ دجوبس كىم؟ دەگەن سياقتى كىتاپتار الەم بويىنشا تارالىپ، وقىلدى. بىزدە تۇلعالار دا، سپورتشىلار دا، كاسىپكەرلەر دە بار. دەگەنمەن، ولار جايلى كوپ ايتىلا بەرمەيدى. ءوز ەڭبەكتەرىمەن جەتىستىككە جەتكەن ادامداردى كوبىرەك ناسيحاتتاپ، جاستارىمىزعا ۇلگى-ونەگە بەرۋىمىز كەرەك. ستيۆ دجوبس، مارك تسۋكەربەرگ كىم ەكەنىن بىلەمىز، ويتكەنى كونتەنت كوپ. ءبىزدىڭ دە تۇلعالارىمىز جەتەرلىك. بىراق، ولاردى ەشكىم بىلمەيدى... مىنە، وسى پروبلەمانى شەشۋمەن اينالىسىپ جاتىرمىز.
كەلەر جىلى كىتاپ دۇكەنىن اشۋ جوسپاردا بار
- كىتاپتان تۇسكەن قارجى Mazmundama-نىڭ ميسسياسى – قازاق ءتىلىنىڭ مازمۇنىن دامىتۋعا، ودان دا كوپ كىتاپ شىعارۋعا جۇمسالادى.
الدا جوسپار كوپ، قازىرگى تاڭدا وقىرماندارعا تاڭداۋ بولۋ ءۇشىن iOS, Android, موبيلدىك جانە Web قوسىمشالارىن دايىنداۋ ۇستىندەمىز. كەلەر جىلى كىتاپ دۇكەنىن اشۋ جوسپاردا بار. كوپتەگەن كىتاپتاردىڭ قۇقىعىن الىپ جاتىرمىز. اتاپ ايتاتىن بولساق:
- The 5AM Club by Robin Sharma;
- The Everyday Hero Manifesto by Robin Sharma;
- The Monk Who Sold His Ferrari: Special 25th Anniversary Edition by Robin Sharma;
- Who Will Cry When you Die? by Robin Sharma;
- The Psychology of Money by Morgan Housel;
- Hachiko Waits by Lesléa Newman;
- Alibaba: The House That Jack Ma Built by Duncan Clark;
- The Leader Who Had No Title by Robin Sharma;
- You Are a Badass: How to Stop Doubting Your Greatness and Start Living an Awesome Life by Jen Sincero;
- You Are a Badass at making money: Master the Mindset of WealthY by Jen Sincero;
- You Are a Badass everyday: How to Keep Your Motivation Strong, Your Vibe High, and Your Quest for Transformation Unstoppable by Jen Sincero;
- Dune by Frank Herbert جانە ت.ب.
انا ءتىلىمىز بارلىق سالادا №1 بولادى
- Mazmundama-دا قازىر جۇزگە جۋىق يدەيالاس، ميسسيالاس ادامدار جۇمىس ىستەيتىنىن اتاپ وتكەن ءجون.
- اۋدارماشىلار مەن رەداكتورلار، كوررەكتورلار مەن ديزاينەرلەر، ماركەتولوگتار مەن ساتۋ ماماندارىنان قۇرىلعان مىقتى كوماندا Mazmundama جوباسى اياسىندا 4 جىلدان بەرى ادامزات اقىل-ويىنىڭ التىن قازىناسىنا اينالعان شەتەلدىك تۋىندىلاردى قازاق تىلىنە اۋدارىپ ساتۋمەن اينالىسىپ كەلەدى. ءبىزدىڭ ەڭ باستى ماقساتىمىز - قازاقستاندا قازاق ءتىلىنىڭ قولدانۋ اياسىن كەڭەيتىپ، جاڭا دەڭگەيگە شىعارۋ. انا ءتىلىمىز بارلىق سالادا №1 بولۋى ءۇشىن قولداۋلارىڭىز كەرەك. ول ءۇشىن بارشاڭىزدى يگى باستاماعا ات سالىسۋعا شاقىرامىن!
- سۇحباتتاسقانىڭىزعا راقمەت! اعارتۋشىلىق جولىنداعى قىزمەتتەرىڭىزگە ساتتىلىك تىلەيمىز!
سۇحباتتاسقان زارينا اشىربەك،
"ادىرنا" ۇلتتىق پورتالى
