پرەسس كارتا العىسى كەلمەگەن جۋرناليستەر قالىپتى جۇمىسىن جالعاستىرا بەرەدى. بۇل تۋرالى اقپارات جانە قوعامدىق دامۋ ءمينيسترى دارحان قىدىرالى Qazaqstan ۇلتتىق ارناسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
“1999 جىلدان بەرى بىزدە زاڭناما وزگەرمەگەن. ول كەزدە ينتەرنەت بولمادى. كوبىنە گازەت-جۋرنالدار بولدى. سوندىقتان قازىر زامان تالابى بويىنشا جاڭا زاڭناماعا قاجەتتىلىك تۋىنداپ وتىرعانى بەلگىلى. ءبىرىنشى، اقپاراتتىق دوكترينا. ونى كەشە عانا ۇكىمەت قاۋلىسىمەن بەكىتىلىپ، پرەزيدەنت اكىمشىلىگىنە ۇسىنىلدى. اقپاراتتىق دوكترينا بىزدەگى نەگىزگى ۇعىمداردى ايقىندايدى. مىسالى، ءسوز بوستاندىعى، ءجۋرناليستىڭ مارتەبەسى، اقپاراتتىق يممۋنيتەتتى ارتتىرۋ، اقپاراتتىق قاۋىپسىزدىككە قارسى تۇرۋ جانە ت.ب. وسىنداي باستى قاعيداتتاردى انىقتايتىن ۇعىمدار دوكترينادا توپتاستىرىلعان”، - دەپ اتاپ ءوتتى ول.
سوزىنشە، ول بىرنەشە ۋاقىت بويى اشىق پورتالدا تۇرعان. وعان قاتىستى ايتىلعان ءارتۇرلى پىكىرلەردىڭ نەگىزگىلەرى ەسكەرىلگەن. سونداي-اق ول مينيسترلىكتىڭ باسقا دا زاڭدارىنا نەگىز بولاتىن تۇعىر.
“ەكىنشى، ماسس مەديا تۋرالى. ول جايىندا كوپتەگەن پىكىر ايتىلىپ جاتقانىن بىلەمىز. بۇل قالىپتى جاعداي. ويتكەنى ول بۇعان دەيىن دە تالقىلانعان جانە الدا ماجىلىسكە دەيىن تاعى تالقىلانادى”، - دەپ اتاپ ءوتتى مينيستر.
دارحان قىدىرالى پرەسس كارتا اينالاسىندا كوتەرىلگەن ماسەلەنى دە ءتۇسىندىرىپ ءوتتى.
“پرەسس كارتا - ول جاقىندا عانا ەنگىزىلگەن تاجىريبە ەمەس، ول كوپتەگەن ەلدە بار. ۋنيۆەرسيتەتتى بىتىرگەن جۋرناليست جۇمىسىن اتقارا بەرەدى. پرەسس كارتا ول ءجۋرناليستىڭ قۇقىقتىق مارتەبەسىن ايقىندايدى. وعان ارتىقشىلىقتار بەرەدى. ءبىر جاعىنان ول ستيمۋل، ىنتالاندىرۋ. سول ارقىلى مىسالى، جەڭىلدىكپەن پاتەر الۋ، الەۋمەتتىك كومەك الۋ نەمەسە اقپاراتقا تەز قول جەتكىزۋ ماسەلەلەرىندە كوپتەگەن ارتىقشىلىققا يە بولادى. پرەسس كارتا العىسى كەلمەگەن جۋرناليستەر قالىپتى جۇمىسىن جالعاستىرا بەرەدى”، - دەپ ءتۇسىندىردى اقپارات ءمينيسترى سۇحباتتا.
ول وسى ماسەلە بويىنشا جۋرناليستەردىڭ سۇراقتارىنا جاۋاپ بەرۋگە دايىن ەكەنىن جەتكىزدى.
