Qoştaspaityndarǧa sabaq. Moŋǧoliia prezidentı räsım ötkızıp doǧarysqa kettı

298
Adyrna.kz Telegram
https://adyrna.kz/storage/uploads/tQzAge863C0FAYwUX5UgDDDYGw32AO08jL5tlzch.jpg

Foto: Montsame agenttıgı

Bügın, 20 qaraşa künı Ūlan-Batorda Sühbaatar alaŋynda Moŋǧoliianyŋ altynşy prezidentı bolǧan 58 jastaǧy Uhnaagiin Hürelsühpen qoştasu räsımı öttı. Būl turaly Montsame agenttıgı jazdy, dep habarlaidy “Adyrna”.

Räsımnıŋ basynda prezidenttık ökılettıgın merzımınen būryn toqtatqan U.Hürelsüh Ūly Şyŋǧys han eskertkışıne taǧzym ettı. Odan keiın arnaiy ornatylǧan mınberge köterılıp, qūrmet qarauyly rotasynyŋ aldynda oryn aldy. Osy kezde rota komandirı, kapitan B.Enhmanlai jeke qūramnyŋ saltanatty räsımge daiyn ekenın baiandady.

Memlekettık änūran oryndalǧannan keiın U.Hürelsüh qūrmet qarauylynyŋ jeke qūramymen sälemdestı. Sondai-aq räsımge qatysqan diplomatiialyq missiialardyŋ basşylarymen, joǧary lauazymdy memlekettık qyzmetkerlermen, küştık qūrylymdar men qūqyq qorǧau organdarynyŋ basşylarymen jäne qoǧam ökılderımen qol alysyp amandasty.

Saltanatty räsım körnektı moŋǧol kompozitorlarynyŋ şyǧarmalaryn oryndaǧan ülgılı äskeri ürmelı aspaptar orkestrınıŋ öner körsetuımen aiaqtaldy. Būdan soŋ U.Hürelsüh ortalyq alaŋnan kettı.

Is-şaraǧa memlekettık organdar men ükımet ökılderı, sonyŋ ışınde parlament - Memlekettık Ūly Huraldyŋ töraǧasy Sandagiin Biambasogt pen Premer-ministr Niam-Osoryn Uchral qatysty.

Būdan aldyn Moŋǧoliia prezidentı Uhnaagiin Hürelsüh öz bedelın qalpyna keltıru maqsatynda prezidenttık ökılettıgınen bas tartuǧa niettı ekenın mälımdegen.  Oǧan deiın Moŋǧoliia Demokratiialyq partiiasynyŋ parlamenttık fraksiiasy ony otstavkaǧa ketuge şaqyryp, ıstıŋ aq-qarasyn anyqtaudy talap etken. «Men būl talapty qoldaimyn. Moŋǧoliia prezidentı retındegı ökılettıgımdı tapsyramyn. Maǧan qatysty tergeu jürgızılıp, abyroiym qalpyna keltırıledı», - degen. Aiyptaular Tavan-Tolgoi – Gaşuunsuhait temırjolyn saluǧa arnalǧan qūpiia tendermen bailanysty. Atalǧan tenderdıŋ jeŋımpazy Bodi Group kompaniiasy bolǧan. Boljam boiynşa, keibır saiasatkerler jalpy somasy 110 million dollar bolatyn para aluy mümkın. Oǧan eldıŋ bırneşe prezidentınıŋ  qatysy boluy mümkın ekenı aitylady. 

19 qaraşada Ūly Hural prezidenttıŋ doǧarysqa ketuın quattaǧan soŋ el basşysy qyzmetın parlament töraǧasy Sandagiin Biambasogt uaqytşa atqaratyn boldy. 

Uhnaagiin Hürelsüh 2021 jyldyŋ 25 mausymynan berı Moŋǧoliia prezidentı qyzmetın atqaryp kelgen. Ol 2017–2021 jyldary el ükımetın basqarǧan. Onyŋ älı aiaqtalmaǧan bırneşe ai ökılettıgı qalǧan edı. Moŋǧoliiada prezident 6 jylǧa bır merzımge ǧana sailana alady. Hürelsüh doǧarysyn jariialaǧan soŋ, el bilıgınde bırneşe lauazym iesı de otstavkaǧa kettı.

Moŋǧoliiada prezidenttıŋ merzımınen būryn öz erkımen qyzmetten ketuı būryn-soŋdy bolmaǧan. 

Pıkırler