ماڭعىستاۋ وبلىسىندا اسكەري بورىشىن وتەۋ كەزىندە قازا بولعان اسكەري قىزمەتشىلەرمەن قوشتاسۋ ءراسىمى ءوتتى، دەپ حابارلايدى "ادىرنا" ءتىلشىسى.
قارالى جيىنعا ماڭعىستاۋ وبلىسىنىڭ اكىمى نۇرداۋلەت قيلىباي، قازاقستاننىڭ قورعانىس ءمينيسترى داۋرەن قوسانوۆ، باس ءمۇفتي ناۋرىزباي قاجى تاعانۇلى، ۇلتتىق قۇرىلتاي مۇشەلەرى، قازاقستان حالىق كەڭەسىنىڭ وكىلدەرى، قوعام قايراتكەرلەرى جانە مارقۇمدارمەن بىرگە قىزمەت اتقارعان اسكەري قىزمەتشىلەر قاتىستى.
جيىن بارىسىندا قازا بولعانداردىڭ تۋعان-تۋىستارى مەن جاقىندارىنا كوڭىل ايتىلىپ، مارقۇمداردىڭ رۋحىنا قۇران باعىشتالىپ، دۇعا جاسالدى.
ماڭعىستاۋ وبلىسى اكىمدىگىنىڭ مالىمەتىنشە، مەملەكەت باسشىسىنىڭ تاپسىرماسىنا سايكەس، قازا بولعان اسكەري قىزمەتشىلەردىڭ وتباسىلارىنا مەملەكەتتىك الەۋمەتتىك تولەمدەر مەن ماتەريالدىق كومەك كورسەتىلىپ جاتىر. سونىمەن قاتار جانازا جانە جەرلەۋ راسىمدەرىن ۇيىمداستىرۋعا قاجەتتى قولداۋ كورسەتىلۋدە.
بۇعان دەيىن وبلىس اكىمدىگى قازا بولعان اسكەري قىزمەتشىلەردىڭ وتباسىلارى مەن زارداپ شەككەندەرگە كومەك كورسەتۋ ءۇشىن ارنايى قور قۇرىلعانىن حابارلاعان. جينالعان قاراجات وتباسىلار مەن زارداپ شەككەندەرگە اتاۋلى ءارى اشىق تۇردە باعىتتالادى.
قاراجاتتىڭ جۇمسالۋى مەملەكەتتىك جانە قۇقىق قورعاۋ ورگاندارىنىڭ باقىلاۋىندا بولادى.
24 قىركۇيەكتە كاسپي تەڭىزىندە "حازار قورعانى - 2026" دەگەن اتپەن وتكىزىلگەن اسكەري جاتتىعۋدا 17 ادام سۋعا اعىپ، 14 سارباز قازا تاپتى.
جاتتىعۋ قورعانىس مينيسترلىگىنىڭ وقۋ-جاتتىعۋدىڭ ستراتەگيالىق كوماندالىق-شتابتىق بىرىڭعاي جوسپار اياسىندا كاسپي تەڭىزىنىڭ قازاقستاندىق سەكتورىندا وتكەن. وعان قازاقستان قارۋلى كۇشتەرى اسكەري-تەڭىز كۇشتەرىنىڭ باس قولباسشىسى، 1-دارەجەلى كاپيتان قانات نيازبەكوۆ جەتەكشىلىك ەتكەن. وقۋ-جاتتىعۋعا اسكەري-تەڭىز كۇشتەرى مەن ولارعا باعىنىستى بولىمشەلەردىڭ 500-دەن استام اسكەري قىزمەتكەر، اسكەري كەمەلەردىڭ ەكيپاجدارى مەن جاعالاۋ بولىمشەلەرى قاتىسقان. ماشىقتانۋعا ۇقك شەكارا قىزمەتىنىڭ ماڭعىستاۋ وبلىسى بويىنشا جاعالاۋ كۇزەتى مەن اۋە قورعانىسى كۇشتەرىنىڭ كۇشتەرى مەن قۇرالدارى تارتىلعان.
