مەملەكەت باسشىسى قاسىم-جومارت توقاەۆ بيىل تامىز ايىندا ءبىر پالاتالى قۇرىلتاي سايلاۋى وتەتىنىن مالىمدەدى. بۇل تۋرالى ول عالىمداردى ماراپاتتاۋ راسىمىندە ايتتى، دەپ حابارلايدى "ادىرنا".
پرەزيدەنتتىڭ ايتۋىنشا، كونستيتۋتسيا كۇشىنە ەنگەننەن كەيىن قۇرىلتاي سايلاۋىن وتكىزۋ تۋرالى جارلىققا قول قويىلادى.
"كونستيتۋتسيا كۇشىنە ەنگەن ساتتەن باستاپ ءبىر پالاتالى قۇرىلتاي سايلاۋىن وتكىزۋ جونىندەگى جارلىققا قول قويامىن. سايلاۋ بيىل تامىز ايىندا وتەدى", – دەدى مەملەكەت باسشىسى.
قاسىم-جومارت توقاەۆ بۇل شەشىمنىڭ الدىن الا جاريالانۋى پارتيالارعا سايلاۋعا دايىندالۋعا جەتكىلىكتى ۋاقىت بەرۋ ماقساتىندا جاسالىپ وتىرعانىن اتاپ ءوتتى.
"مۇنى ادەيى ەرتە ايتىپ وتىرمىن. ويتكەنى پارتيالاردىڭ جوسپارلارىن ايقىنداپ، سايلاۋ ناۋقانىنا دايىندىق جۇرگىزۋىنە جەتكىلىكتى ۋاقىتى بولۋى كەرەك. وسىلايشا، پارتيالاردىڭ سايلاۋشىلارمەن ءتيىستى جۇمىس جۇرگىزۋىنە بەس ايعا جۋىق ۋاقىت بەرىلەدى",-دەيدى پرەزيدەنت توقاەۆ.
پرەزيدەنتتىڭ ايتۋىنشا، قۇرىلتاي سايلاۋى قازاقستاننىڭ بۇكىل ساياسي جۇيەسىن جاپپاي «قايتا قۇرۋعا» جول اشادى.
"بۇل رەتتە ءبىز جۇزەگە اسىرىپ جاتقان ساياسي جانە ەكونوميكالىق رەفورمالار قوعامدىق سانانىڭ وڭ سيپاتتا وزگەرۋىنە اسەر ەتۋگە ءتيىس. مەن مۇنىڭ ماڭىزى جونىندە بىرنەشە رەت ايتتىم،"- دەدى ەل باسشىسى.
