فوتو: اشىق دەرەككوزدەن
بىرىككەن ۇلتتار ۇيىمىنىڭ نەگىزسىز قاماۋعا الۋ جونىندەگى جۇمىس توبى قازاقستاندىق جۋرناليست دۋمان مۇحاممەدكارىمنىڭ باس بوستاندىعىنان ايىرىلۋىن نەگىزسىز دەپ تانىدى، دەپ حابارلايدى "ادىرنا".
Politico دەرەگىنشە، ساراپشىلار قازاقستان بيلىگىن ءجۋرناليستى دەرەۋ بوساتۋعا شاقىردى.
بۇۇ جۇمىس توبىنىڭ №18/2026 پىكىرىندە ءجۋرناليستىڭ كاسىبي قىزمەتىنە بايلانىستى قۋدالانعانى جانە ءادىل سوت تالقىلاۋىنا قۇقىعى بۇزىلعانى ايتىلعان.
«ساراپشىلار باس بوستاندىعىنان ايىرۋ ورىندارىندا دا زاڭسىزدىقتىڭ جالعاسىپ جاتقانىنا الاڭداۋشىلىق ءبىلدىرىپ، شەشىم سوڭىندا ونى دەرەۋ بوساتۋعا شاقىردى»، – دەلىنگەن قۇقىق قورعاۋ ۇيىمىنىڭ حابارلاماسىندا.
جۇمىس توبىنىڭ قورىتىندىسىنا سايكەس، دۋمان مۇحاممەدكارىمدى قاماۋدا ۇستاۋ ادام قۇقىقتارىنىڭ جالپىعا بىردەي دەكلاراتسياسىنىڭ 2, 3, 7, 9, 10, 11, 19 جانە 21-باپتارىنا، سونداي-اق ازاماتتىق جانە ساياسي قۇقىقتار تۋرالى حالىقارالىق پاكتىنىڭ 9, 14, 15, 19, 25 جانە 26-باپتارىنا قايشى كەلەدى.
قازىر دۋمان مۇحاممەدكارىم جازاسىن قىزىلوردا قالاسىنداعى تۇزەۋ مەكەمەسىندە وتەپ جاتىر. بۇعان دەيىن ونىڭ ادۆوكاتى مەن قورعاۋشىلارى ءجۋرناليستىڭ دەنساۋلىعى كۇرت ناشارلاعانىن ايتىپ، الاڭداۋشىلىق بىلدىرگەن.
ال قىلمىستىق-اتقارۋ جۇيەسى كوميتەتى مەديتسينالىق تەكسەرۋ قورىتىندىسى بويىنشا سوتتالۋشىنىڭ جاعدايى قاناعاتتانارلىق ەكەنىن حابارلادى. ۆەدومستۆونىڭ مالىمەتىنشە، ول جوسپارلى مەديتسينالىق تەكسەرۋدەن ءوتىپ تۇرادى جانە اۋىر دەرت بەلگىلەرى انىقتالماعان. سونداي-اق كوميتەت سوتتالۋشىلاردىڭ دەنساۋلىعى ادام قۇقىقتارى جونىندەگى ۋاكىلدىڭ تۇراقتى باقىلاۋىندا ەكەنىن ايتتى.
