قازاقستان مەن وزبەكستان اراسىنداعى شەكارادا ۇزىن-سونار كولىك كەزەگى جويىلدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
وزبەكستاندا ورنالاسقان «ناۆوي» باقىلاۋ-وتكىزۋ بەكەتىندە كەپتەلىس ماسەلەسى شەشىلگەنى حابارلاندى.
وزبەكستان كەدەن كوميتەتىنىڭ ءباسپاسوز حاتشىسى حۋسان تانگريەۆ ساعات 20:20-دا تۇسىرىلگەن بوس باقىلاۋ ايماعىنىڭ سۋرەتىن جاريالاپ، بەكەتتەگى كەپتەلىستەر قابىلدانعان شارالاردىڭ ناتيجەسىندە جويىلعانىن اتاپ ءوتتى.
بۇعان دەيىن وسى كۇنى قوس مەملەكەتتىڭ شەكارا جانە كەدەن ورگاندارى وكىلدەرى «ناۆوي» وتكىزۋ پۋنكتىندە كەزدەسىپ، قۇربان ايت مەرەكەسى قارساڭىندا پايدا بولعان جەڭىل كولىك كەپتەلىسىن جويۋ ماسەلەسىن تالقىلاعان.
ناتيجەسىندە تاراپتار قوسىمشا رەسۋرستاردى جۇمىلدىرىپ، رەۆەرسيۆتى قوزعالىس ەنگىزۋ تۋرالى شەشىم قابىلداعان.
تانگريەۆتىڭ ايتۋىنشا، سوڭعى بەس جىلدا قازاقستان مەن وزبەكستان اراسىنداعى كولىك پەن جولاۋشىلار لەگى ەكى ەسەگە ارتقان. قازىردىڭ وزىندە «ناۆوي» بەكەتى ارقىلى كۇن سايىن شامامەن 40 مىڭ جولاۋشى مەن 2 مىڭ كولىك شەكارادان وتەدى.
دەگەنمەن، كەدەن قىزمەتكەرى كەپتەلىستىڭ تولىق جويىلۋىنا كەپىلدىك جوق ەكەنىن ايتتى. سەبەبى ءبىر كولىكتى تەكسەرۋگە ورتا ەسەپپەن 5-10 مينۋت كەتەدى. وسىعان بايلانىستى ازاماتتارعا سىرداريا وبلىسىنداعى حالىقارالىق ەمەس «وق التىن» جانە «مالىك» سەكىلدى بالاما وتكىزۋ پۋنكتتەرىن پايدالانۋعا كەڭەس بەردى. بۇل بەكەتتەر ارقىلى كۇن سايىن 1500-گە جۋىق ادام جانە 250 كولىك وتەدى.
سونداي-اق بىرقاتار وتكىزۋ بەكەتتەرىنىڭ جوندەۋ جۇمىستارى دا جاعدايدى كۇردەلەندىرىپ وتىر. اتاپ ايتقاندا، «گيشتكۋپريك» بەكەتى ۋاقىتشا جابىلعان. وزبەكستان تاراپى بۇل بەكەتتەگى جوندەۋ جۇمىستارىنىڭ اياقتالۋعا تاياۋ ەكەنىن ايتسا، قازاقستان جاعىنداعى «جىبەك جولى» بەكەتىندە جوندەۋ ەندى عانا باستالعان.
ەسكە سالساق، وسىعان دەيىن شەكارادا جۇرگىزۋشىلەر ءبىر تاۋلىكتەن اسا ۋاقىت شەكارادان وتە الماي تۇرعانى تۋرالى حابارلاعان ەدىك.
ۇقساس جاڭالىقتار
