ۇكىمەت ۇيىندە قر پرەمەر-ءمينيسترى ءاليحان سمايىلوۆ ورتالىق مەملەكەتتىك ورگاندار جانە وبلىس اكىمدىكتەرى باسشىلىعىنىڭ قاتىسۋىمەن جيىن وتكىزدى. جيىندا ۇكىمەت باسشىسى الەۋمەتتىك ماڭىزعا يە ازىق-تۇلىك تاۋارلارى باعاسىنىڭ شارىقتاۋىن سىنعا الدى، دەپ حابارلايدى "ادىرنا" ۇلتتىق پورتالى "https://primeminister.kz"-گە سىلتەمە كورسەتىپ.
ساۋدا جانە ينتەگراتسيا ءبىرىنشى ۆيتسە-ءمينيسترى ارمان شاققاليەۆ سوڭعى 10 ايدا ازىق-تۇلىك ينفلياتسياسىنىڭ 20,5%-عا جەتكەنىن حابارلادى. وتكەن ايدىڭ قورىتىندىسى بويىنشا الەۋمەتتىك ماڭىزى بار ازىق-تۇلىك تاۋارلارىنا باعانىڭ ءوسۋى 0,8%-دى كورسەتتى. اتاپ ايتقاندا، جۇمىرتقا 7,6%-عا، ۇن 3,9%-عا، كۇرىش 3%-عا، ءسۇت 2,2%-عا قىمباتتادى. سونىمەن قاتار ءبىر اپتا ىشىندە ءسابىز (0,8%), كارتوپ (0,6%), قانت جانە قىرىققابات (0,1%) قۇنى تومەندەگەن.
ازىق-تۇلىك ونىمدەرىنىڭ باعاسىن تۇراقتاندىرۋ ماقساتىندا استىقتى، جەمشوپ جانە كۇنباعىس مايىن ارزانداتۋ ماسەلەسى جوسپاردا بار. دەگەنمەن، ونىڭ ايتۋىنشا، جۇمىرتقا، وسىمدىك مايى، كۇرىش سەكىلدى تاۋار ساتاتىندار بۇل جوسپاردى جۇيەلى ورىنداۋعا ىرىق بەرمەي وتىرعانى بايقالادى.
«اباي وبلىسىنا بارعان كەزدە سەمەيدەن 200 شاقىرىم جەردە ورنالاسقان قۇس فابريكالارى جۇمىرتقانى وندىعىنا 360-380 تەڭگەدەن ساتقان، ال سوڭعى ساتىپ الۋشىعا ول 600 تەڭگەدەن وتكىزىلگەنى انىقتالدى. وسىعان بايلانىستى مونوپولياعا قارسى ارەكەت ەتۋدىڭ شۇعىل شارالارىن قابىلداۋ قاجەت. سونىمەن قاتار سوڭعى كەزدەرى باسپاسوزدە جەكەلەگەن تاۋار وندىرۋشىلەردىڭ الداعى ۋاقىتتا باعانىڭ كوتەرىلەتىنى تۋرالى مالىمدەمەلەرى جاريالانۋدا. بۇل رەتتە ءتيىستى تۇردە ارەكەت ەتۋ قاجەت»، — دەدى ارمان شاققاليەۆ.
اۋىل شارۋاشىلىعى ءمينيسترى ەربول قاراشوكەەۆ قىزاناق، قيار جانە جۇمىرتقا باعاسىنىڭ ءوسۋ سەبەپتەرىن ايتتى. تاۋار باعاسىن تۇراقتاندىرۋ جونىندەگى ىقتيمال شارالار تۋرالى باياندادى. ول كەيبىر تاۋار وندىرۋشىلەر مەملەكەتتىك سۋبسيديالاۋ كولەمىن ۇلعايتۋدى سۇرايتىنىن اتاپ ءوتتى.
«بيىل اۋىل شارۋاشىلىعىن سۋبسيديالاۋ ەكى ەسەگە ۇلعايتىلدى، بىراق ونى الاتىنداردىڭ ازىق-تۇلىك باعاسىن 20%-عا كوتەرگەنىن كورىپ وتىرمىز. مۇنداي جاعدايعا كونە الماسپىز. ەگەر ءبىز سۋبسيديا بەرسەك، وندا ولار قارسى مىندەتتەمەلەر قابىلداۋى كەرەك. سۋبسيديالاۋ جۇيەسى ناقتى جۇمىس ىستەۋى ءتيىس»، — دەدى ءاليحان سمايىلوۆ.
وبلىس اكىمدەرىنىڭ باياندامالارىن تىڭداعاننان كەيىن ءا. سمايلوۆ:
«مينيسترلىكتەر مەن اكىمدىكتەردە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن رەتتەۋ ءۇشىن بارلىق قاجەتتى قۇرالدار، قارجى قۇرالدارى، باقىلاۋ فۋنكتسيالارى بار، بىراق باعانىڭ ءوسۋ قارقىنىن توقتاتا الماي وتىرمىز»، — دەدى.
ۇكىمەت باسشىسى الماتى، جامبىل، پاۆلودار، اتىراۋ، قوستاناي جانە اقمولا وبلىستارى باسشىلىقتارى ىسىندەگى شيكىلىكتى سىنعا الدى.
«بۇل – اكىمدىكتەردىڭ ءالسىز جۇمىسىنىڭ جانە اۋىل شارۋاشىلىعى، ساۋدا جانە ينتەگراتسيا مينيسترلىكتەرى تاراپىنان ۇيلەستىرۋدىڭ جەتكىلىكسىزدىگىنىڭ ناتيجەسى", - دەدى ءا. سمايلوۆ.
سونىمەن قاتار پرەمەر-مينيستر ساۋدا جانە ينتەگراتسيا مينيسترلىگىنە وسى باعىتقا جەتەكشىلىك ەتەتىن لاۋازىمدى تۇلعالاردى تارتىپتىك جاۋاپكەرشىلىككە تارتۋعا ۇسىنىس ەنگىزۋدى مىندەتتەدى. ساۋدا كوميتەتىنىڭ توراعاسىن قىزمەتىنەن بوساتۋدى تاپسىردى. جيىنعا قاتىسقاندارعا الەۋمەتتىك ماڭىزى يە ازىق-تۇلىك ونىمدەرى باعاسىنىڭ نەگىزسىز وسۋىنە جول بەرمەۋدى قاداپ ايتتى.
"ادىرنا" ۇلتتىق پورتالى
