الەمدىك اقپارات قۇرالدارى مەن الەۋمەتتىك جەلىلەردە اقش پرەزيدەنتى دونالد ترامپ پەن ميللياردەر كاسىپكەر يلون ماسك اراسىنداعى اشىق قاقتىعىس قوعام نازارىن اۋداردى. بۇل جانجال تەك جەكە قارىم-قاتىناستان ەمەس، اقش-تىڭ ساياسي، ەكونوميكالىق جانە اسكەري مۇددەلەرىنە دە اسەر ەتەتىن ماڭىزدى وقيعا رەتىندە باعالانۋدا، دەپ حابارلايدى “ادىرنا”.
«تسارگراد» باسىلىمىنىڭ پىكىرىنشە، بۇل ينتەرنەتتەگى قاقتىعىس ناعىز توڭكەرىس جاساۋ ارەكەتىنە ۇقسايدى. ترامپ شابۋىلدارعا توتەپ بەرىپ جاتىر، بىراق بۇل جاعدايدا ۇتاتىن تاراپ — رەسەي، دەپ سانايدى باسىلىم.
5 ماۋسىمدا گەرمانيا كانتسلەرى فريدريح مەرتسپەن وتكەن ءباسپاسوز ءماسليحاتىندا دونالد ترامپ جۋرناليستەرگە ماسكپەن قارىم-قاتىناسى راسىمەن بۇزىلعانىن ايتتى. بۇعان جاۋاپ رەتىندە ماسك ترامپ ءوزىنىڭ كومەگىنسىز سايلاۋدا جەڭىسكە جەتە الماس ەدى دەپ مالىمدەدى. ءتىپتى ماسكتىڭ قولداۋى بولماعاندا، دەموكراتتار اقش سەناتىندا باسىمدىققا يە بولار ەدى دەدى ول. ترامپ بۇل سوزدەردى جاۋاپسىز قالدىرماي، ماسك ءوز مىندەتىن دۇرىس اتقارماي ءجۇر جانە «ەسى اۋىسقان» دەپ جاۋاپ قاتتى. اقش پرەزيدەنتى ماسك كومپانيالارىمەن مەملەكەتتىك كەلىسىمشارتتاردى بۇزىپ، بارلىق سۋبسيديالاردى الىپ تاستايمىن دەپ سەس كورسەتتى.
«بيۋدجەتىمىزدەن ميللياردتاعان دوللار ۇنەمدەۋدىڭ ەڭ وڭاي جولى — يلونعا تيەسىلى مەملەكەتتىك سۋبسيديالار مەن كەلىسىمشارتتاردى توقتاتۋ»، — دەپ جازدى ترامپ.
ترامپ اكىمشىلىگىنىڭ Tesla كومپانياسىنان EV-كۆوتاسىن تارتىپ الۋ شەشىمىنىڭ اياسىندا ماسكتىڭ كومپانياسىنىڭ اكتسيالارى 15%-عا قۇلدىرادى. وسىدان كەيىن ماسك ترامپتىڭ اتى ەپشتەين فايلدارىندا بار دەپ مالىمدەدى جانە ءدال سول سەبەپتى بۇل فايلدار ءالى كۇنگە دەيىن جاريالانباعان دەدى. بۇل پەدوفيلياعا تىكەلەي مەڭزەۋ بولدى.
بۇرىن يلون ماسك اقش-تىڭ دەموكراتيالىق پارتياسىنىڭ ساياسي ۇستانىمدارىن قولداعان. ونىڭ ترامپقا جاساعان شابۋىلدارى ءدال وسى ساياسي كۇشكە ويناپ جاتىر دەگەن پىكىردى Telegram-داعى Win/Win ارناسى ءبىلدىردى.
«ەگەر دونالد ترامپ پەن يلون ماسك اراسىنداعى قاقتىعىس — جاي قويىلىم ەمەس، ناقتى ساياسي كۇرەس بولسا، ونىڭ سالدارى SpaceX ءۇشىن عانا ەمەس، بۇكىل ۋكراينا اسكەرى ءۇشىن دە وتە اۋىر بولۋى مۇمكىن. سەبەبى ماسكتى كەلىسىمشارتتاردان ايىرۋ — بۇل تەك زىمىران ۇشىرۋ قىزمەتتەرى بويىنشا مەملەكەتتىك كەلىسىمشارتتارعا عانا ەمەس، سونىمەن بىرگە ۆسۋ ءۇشىن جالعىز تۇراقتى بايلانىس ارناسى بولىپ وتىرعان Starlink جۇيەسىنە دە سوققى بولادى»،— دەپ جازادى Telegram-داعى «ۆوەننايا حرونيكا» ارناسى.
«تسارگراد» باسىلىمىنىڭ مالىمەتىنشە، بۇل قارسىلاسۋدان قازىر رەسەي ۇتىپ وتىر. باسىلىمنىڭ دەرەگىنشە، ەگەر اقش-تىڭ NASA اگەنتتىگى ماسكتىڭ كومپانيالارىمەن ىنتىماقتاستىقتى توقتاتسا، ولار رەسەيدەن كومەك سۇراۋعا ءماجبۇر بولادى، ويتكەنى الەمدىك نارىقتا بىرەگەي اەروعارىشتىق جابدىقتى شىعاراتىن باسقا ءوندىرۋشى جوق. ونسىز ۆاشينگتون عارىش سالاسىنداعى كوشباسشىلىعىنان تەز ايىرىلىپ قالۋى مۇمكىن. الايدا ۇزاق مەرزىمدى پەرسپەكتيۆادا ترامپ پەن ماسكتىڭ شايقاسى اۋىر سالدارعا الىپ كەلۋى مۇمكىن. ەگەر دەموكراتتار ۆاشينگتوندا بيلىككە قايتا ورالسا، رەسەيدىڭ اقش-پەن ديالوگ ورناتۋ ارەكەتتەرى تولىقتاي كۇيرەۋى ىقتيمال.
