كوللاج جي كومەگىمەن جاسالدى
ارمەنيا ۇلتتىق جينالىسى كەزەكتەن تىس وتىرىستا سايلاۋ كودەكسى مەن «رەفەرەندۋم تۋرالى» زاڭعا ەنگىزىلگەن تۇزەتۋلەردى ماقۇلدادى، دەپ حابارلايدى "ادىرنا" ۇلتتىق پورتالى.
جاڭا وزگەرىستەرگە سايكەس، ەلدە تۇراقتى تۇرمايتىن ارمەنيا ازاماتتارى بۇدان بىلاي سايلاۋ مەن رەفەرەندۋمدارعا قاتىسا المايدى.
جاڭا تالاپ بويىنشا جالپىحالىقتىق سايلاۋ مەن رەفەرەندۋمدا داۋىس بەرۋ قۇقىعى سوڭعى ەكى جىلدىڭ ىشىندە ارمەنيا اۋماعىندا كەمىندە ءبىر جىل تۇراقتى تۇرعان ازاماتتارعا عانا بەرىلەدى. بۇل تالاپ سايلاۋعا دەيىن 48 كۇن بۇرىن، ال كەزەكتەن تىس سايلاۋ كەزىندە 28 كۇن بۇرىن ەسەپكە الىنادى. سونىمەن قاتار ارمەنيا پارلامەنتى سايلاۋشىلاردى ساتىپ العانى ءۇشىن جازانى كۇشەيتتى. قىلمىستىق كودەكسكە ەنگىزىلگەن وزگەرىستەرگە سايكەس، مۇنداي قىلمىس ءۇشىن سوتتالعان ازاماتتار ءومىر بويىنا مەملەكەتتىك جانە مۋنيتسيپالدىق قىزمەتتەردى، سونداي-اق اكىمشىلىك جانە وكىلەتتى لاۋازىمداردى اتقارۋ قۇقىعىنان ايىرىلادى.
زاڭ جوباسىن بيلىكتەگى «ازاماتتىق كەلىسىم» فراكتسياسىنىڭ دەپۋتاتتارى ۇسىندى. ولار قۇجاتتى ءبىراۋىزدان قولدادى. ال وپپوزيتسيا داۋىس بەرۋگە قاتىسۋدان باس تارتىپ، قابىلدانعان تۇزەتۋلەر ازاماتتاردىڭ سايلاۋ قۇقىعىن شەكتەيتىنىن ايتىپ، كونستيتۋتسيالىق سوتقا شاعىمداناتىنىن مالىمدەدى.
پارلامەنت وكىلدەرىنىڭ ايتۋىنشا، وزگەرىستەر «ەلەكتورالدىق ءتۋريزمنىڭ» الدىن الۋ ماقساتىندا قابىلدانعان.
