الماتىدا ارمەنيا مەن ازەربايجان سىرتقى ىستەر مينيسترلەرى ارارات ميرزويان مەن دجەيحۋن بايراموۆ بەيبىت كەلىسىمگە قول جەتكىزۋ جولدارىن انىقتاۋ بويىنشا ەكىجاقتى كەلىسسوزدەردى اياقتادى، دەپ حابارلايدى “ادىرنا” ۇلتتىق پورتالى تاسس اگەنتتىگىنە سىلتەپ.
10 مامىر كۇنگى دوستىق ۇيىندەگى كەزدەسۋ ءتورت ساعاتتان استام ۋاقىتقا سوزىلدى. كەلىسسوزدەردىڭ ناتيجەسى ءالى جاريالانعان جوق. ازەربايجان سىرتقى ىستەر مينيسترلىگى بۇعان دەيىن تاراپتار بەيبىتشىلىك پەن مەملەكەتارالىق قارىم-قاتىناس ورناتۋ تۋرالى ەكىجاقتى كەلىسىم جوباسىن تالقىلايتىنىن حابارلاعان.
ءبىر كۇن بۇرىن قازاقستاننىڭ سىرتقى ىستەر مينيسترلىگى باق وكىلدەرىنە «كەلىسسوزدەر اياقتالعاننان كەيىن باسپاسوزگە قولجەتىمدىلىك پەن قاتىسۋشىلاردىڭ سۇراقتارى قاراستىرىلماعانىن» ەسكەرتتى. ارمەنيا سىرتقى ىستەر مينيسترلىگىنىڭ ءباسپاسوز حاتشىسى اني باداليان تاسس تىلشىسىنە كەلىسسوزدەردىڭ ناتيجەلەرى كەيىنىرەك جاريالانۋى مۇمكىن ەكەنىن ايتتى.
كەزدەسۋ باسىندا ەكى ەلدىڭ سىرتقى ىستەر مينيسترلەرى قازاقستاندىق تاراپقا ونى ۇيىمداستىرعانى ءۇشىن العىس ءبىلدىردى:
«بۇگىن ءبىزدىڭ وسى اسەم قالادا، سونىمەن قاتار 1991 جىلى الماتى دەكلاراتسياسىنا قول قويىلعان عيماراتتا جينالۋىمىزدىڭ سيمۆولدىق ءمانى بار، بۇل قۇجاتقا بۇرىنعى وداقتاس رەسپۋبليكالاردىڭ 11-ءى قول قويعان، ال سول 11 رەسپۋبليكا بۇرىنعى اكىمشىلىك بيلىك جۇرگىزگەنىن مويىنداعان»، - دەدى ارمەنيا سىرتقى ىستەر ءمينيسترى ارارات ميرزويان.
