مەملەكەت باسشىسى رەسەيدىڭ قازاقستانداعى ەلشىسى الەكسەي بوروداۆكيندى قابىلدادى، دەپ حابارلايدى «ادىرنا» ۇلتتىق پورتالى.
كەزدەسۋ بارىسىندا قازاقستان پرەزيدەنتى مەملەكەتارالىق بايلانىستاردىڭ بارلىق باعىتى بويىنشا ەكى ەل اراسىندا تۇراقتى ديالوگ قالىپتاسقانىن اتاپ ءوتتى.
قاسىم-جومارت توقاەۆتىڭ ايتۋىنشا، رەسەي پرەزيدەنتى ۆلاديمير ءپۋتيننىڭ جۋىردا استاناعا جاساعان رەسمي ساپارى كەزىندە قول جەتكىزىلگەن ۋاعدالاستىقتار تاتۋ كورشىلىك قاتىناستاردى جان-جاقتى نىعايتۋعا باعىتتالعان ءوزارا ۇمتىلىستى تاعى دا راستادى.
سونىمەن قاتار كەزدەسۋدە قازاقستان مەن رەسەي اراسىنداعى ستراتەگيالىق سەرىكتەستىكتىڭ وزەكتى ماسەلەلەرى جانە دامۋ پەرسپەكتيۆالارى قاراستىرىلدى.
ەستەرىڭىزگە سالا كەتەيىك، وتكەن جىلى جەلتوقسان ايىندا رەسەيدىڭ قازاقستانداعى ەلشىسى الەكسەي بوروداۆكين رەسەيلىك باسىلىمداردىڭ بىرىنە بەرگەن سۇحباتىندا قازاقستانداعى راديكالدى ۇلتشىلدار مەن رۋسوفوبيا تۋرالى ايتىپ، رەسەيدىڭ ولارمەن كۇرەسكە «كومەك بەرۋگە دايىن» ەكەنىن مالىمدەگەن بولاتىن. ارتىنشا ءماجىلىس توراعاسى ەرلان قوشانوۆ جۋرناليستەرگە بوروداۆكيننىڭ بەرگەن سۇحباتىنا قاتىستى پىكىرىن بىلدىرگەن بولاتىن.
«ەلشىنىڭ سۇحباتىنىڭ كەي تۇستارى ونىڭ مارتەبەسىنە ساي كەلمەيدى ءارى پايدا اكەلمەيدى دەپ ويلايمىن. بوروداۆكين مىرزا وتە تاجىريبەلى ديپلومات، ول ۇگىت-ناسيحاتشىلار مەن ساياساتتانۋشىلاردىڭ جەتەگىندە كەتپەۋى كەرەك»، - دەگەن ەدى ەرلان قوشانوۆ.
وسى وقيعاعا بايلانىستى قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ تا تۇسىنىكتەمە بەرىپ، رەسەي ەلشىسىنىڭ مينيسترلىككt شاقىرتىلىپ، اڭگىمە وتكىزىلگەنىن جانە ونىڭ "كەشىرىمى قابىلدانعانىن" ايتقان.
الەكسەي بوروداۆكين 2018 جىلى رەسەيدىڭ قازاقستانداعى ەلشىسى قىزمەتىنە تاعايىندالعان ەدى. ول قازاقستاندا ۇزاق ءىسساپاردا بولعان ديپلوماتتىڭ ءبىرى.
قازاقستانعا كەلگەنگە دەيىن ول مىنانداي قىزمەتتەر اتقارعان.
1999 جىلدان 2002 جىلعا دەيىن – تمد ءتورتىنشى دەپارتامەنتىنىڭ ديرەكتورى;
2002-2004 جىلدارى – رەسەيدىڭ سلوۆاكياداعى ەلشىسى;
2008 جىلدان 2011 جىلعا دەيىن – رەسەي سىرتقى ىستەر ءمينيسترىنىڭ ورىنباسارى;
2011-2018 جىلدارى - جەنەۆاداعى، شۆەيتسارياداعى بۇۇ كەڭسەسى جانە باسقا دا حالىقارالىق ۇيىمدار جانىنداعى رەسەيدىڭ تۇراقتى وكىلى، سونداي-اق بۇۇ-نىڭ قارۋسىزدانۋ جونىندەگى كونفەرەنتسياسىنداعى رەسەيدىڭ تۇراقتى وكىلى جانە بۇۇ ادام قۇقىقتارى جونىندەگى كەڭەسىندەگى رەسەي دەلەگاتسياسىنىڭ باسشىسى.
«ادىرنا» ۇلتتىق پورتالى
