فوتو: 112.kz
الماتى تاۋلارىندا اۋا رايىنىڭ كۇرت سۋىتۋىنا بايلانىستى وزدىگىنەن تومەن تۇسە الماي قالعان ەكى تۋريستكە قۇتقارۋشىلار كومەك كورسەتتى. بۇل تۋرالى توتەنشە جاعدايلار مينيسترلىگى مالىمدەدى، دەپ حابارلايدى “ادىرنا”.
وقيعا قاراساي اۋدانىنداعى 2 600 مەتر بيىكتىكتە ورنالاسقان «تەررا» الاڭى ماڭىندا بولعان. 2003 جانە 2004 جىلى تۋعان ەكى جاس جىگىت اۋا تەمپەراتۋراسىنىڭ تومەندەۋىنە بايلانىستى تاۋدان ءوز بەتىمەن تۇسە الماي قالعان.
وقيعا ورنىنا جەتكەن الماتى قالاسىنىڭ مونيتورينگ جانە جەدەل ارەكەت ەتۋ ورتالىعىنىڭ ماماندارى تۋريستەردى قاۋىپسىز جەرگە جەتكىزىپ، ەكولوگيالىق بەكەتكە دەيىن الىپ ءتۇستى. ابىروي بولعاندا، ولاردىڭ مەديتسينالىق كومەككە مۇقتاجدىعى بولماعان. كەيىن ەكەۋى ۇيلەرىنە وزدىگىنەن قايتقان.
وسى جاعدايعا بايلانىستى تجم وكىلدەرى تاۋعا شىعاتىن ازاماتتارعا قاۋىپسىزدىك تالاپتارىن ساقتاۋدى ەسكەرتتى. ماماندار ساپار الدىندا مارشرۋتتى الدىن الا جوسپارلاپ، اۋا رايى بولجامى مەن كۇننىڭ باتۋ ۋاقىتىن ەسكەرۋگە كەڭەس بەرەدى. سونداي-اق بەلگىلەنگەن باعىتتان اۋىتقىماي، ءوز مۇمكىندىكتەرىن دۇرىس باعالاۋ قاجەتتىگىن اتاپ ءوتتى.
