الماتى اۋەجايى 13 قاڭتاردان باستاپ جۇمىسىن جالعاستىرادى. بۇل تۋرالى قر ءىىم تقك ءباسپاسوز قىزمەتى حابارلادى.
"2022 جىلدىڭ 13 قاڭتارىنان باستاپ الماتى حالىقارالىق اۋەجايى جۇمىسىن قايتا باستايدى. اۋەجاي باسشىلىعىنىڭ الدىن الا مالىمەتى بويىنشا ىشكى جانە حالىقارالىق رەيستەر اۋە كومپانياسىنىڭ ۇشۋ كەستەسىنىڭ ۋاقىتىنا سايكەس ساعات 8.00-دەن 21.00-گە دەيىن ورىندالادى", - دەپ حابارلايدى ءباسپاسوز قىزمەتى.
الماتى اۋەجايىنىڭ ءباسپاسوز قىزمەتى اۋە ايلاعى 2022 جىلدىڭ 13 قاڭتارىنان باستاپ ساعات 00.00-دە جۇمىسىن جالعاستىراتىنىن حابارلادى.
"الماتى قالاسىندا كومەندانتتىق ساعاتتىڭ ەنگىزىلۋىنە بايلانىستى اۋەجاي ساعات 08.00-دەن 21.00-گە دەيىن جۇمىس ىستەيدى. ىشكى رەيستەر دە، حالىقارالىق رەيستەر دە ورىندالادى. قاۋىپسىزدىكتى قامتاماسىز ەتۋ ماقساتىندا تەرمينالعا تەك جولاۋشىلار عانا كىرە الادى", - دەلىنگەن حابارلامادا.
ەسكە سالا كەتەيىك، 6 قاڭتاردا الماتى اۋەجايى باسىپ الىنىپ، ناتيجەسىندە بەس ۇشاق قاراقشىلاردىڭ قولىندا بولعان ەدى. كەيىن قالانىڭ اۋە ايلاعى بوساتىلدى، بىراق اۋەجايدىڭ جۇمىسى اۋەلى 9 قاڭتارعا دەيىن ۋاقىتشا، كەيىنىرەك بەلگىسىز مەرزىمگە توقتاتىلدى. قاڭتاردىڭ 11-ءى كۇنى الماتى اكىمى قالا اۋەجايىنداعى بارلىق تەحنيكانىڭ رەتكە كەلتىرىلىپ، جۇمىسقا دايىن ەكەنىن ايتتى.
الماتى اۋەجايىنا كەلۋگە ءتيىس رەيستەردىڭ كوپشىلىگىن نۇر-سۇلتان مەن شىمكەنت اۋە ايلاقتارى قابىلدادى.
"ادىرنا" ۇلتتىق پورتالى
