جەر سىلكىنىسىنەن كەيىنگى الماتى حالقىن مازاق ەتكەندەرگە تۇرعىندار اشۋلاندى، دەپ حابارلايدى "ادىرنا" ءتىلشىسى Stan.kz-كە سىلتەپ.
الەۋمەتتىك جەلىدە سانجار ەسىمدى جىگىت جەر سىلكىنىسىندە قورقىپ، سىرتقا قاشقانداردى سىناعاندارعا جاۋاپ بەردى.
“بۇل بەينەۇندەۋدە الماتىنىڭ جەرگىلىكتى تۇرعىندارىنا ارنايمىن. الماتىدا جەر سىلكىنىسى بولدى. ءزىلزالا تۋرالى كەز كەلگەن ۆيدەونىڭ استىنداعى پىكىردى وقىساڭىز “مەيىرىمسىز الماتىلىقتاردىڭ” جازعاندارىن تاباسىز. “سىرتتان كەلگەندەر كەتتى-اۋ”، “جەرىمىز كەڭىپ قالدى”، “مەن جەر ۇيدە تۇرامىن، كوپقاباتتى ۇيدە تۇراتىندار، وزدەرىڭ قينالا بەرىڭدەر” دەپ جازعاندار دا بار. تۇسىنەسىڭدەر مە، بۇل ادامگەرشىلىككە جاتپايدى. ءتىپتى بىرەۋلەر “بىلمەيمىن، مەن ۇيىمدە جاتتىم. ال پاتەر جالداپ تۇراتىندار، قورقىپ دالاعا قاشتى” دەپ جازىپتى. ادامدار ءوز قاۋىپسىزدىگىن ويلاپ ءجۇر”، – دەيدى اشىنعان ول.
ال ءوزىن "الماتىلىقپىن" دەپ تانىستىرعان كەيبىر وقىرمان “باسقاسىن بىلمەيمىن، بىراق كەپتەلىسسىز جۇرگەن ۇناپ قالدى”، “سىرتتان كەلگەندەر ادامگەرشىلىك تانىتىپ جاتىر ما؟ ءبىز بارىنشا شىداپ باعۋدامىز، بىراق شىدامنىڭ دا شەگى بار”، “جاسىراتىن نەسى بار؟ ءبارى كەتىپ ەدى جەرىمىز كەڭەيدى. كولىكتەر ازايدى” دەپ ءتۇرلى پىكىر جازۋدا.
