قىرعىزستاننىڭ كونستيتۋتسيالىق سوتى ءولىم جازاسىن قايتارۋ ماسەلەسىن قاراۋدان باس تارتتى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
«كونستيتۋتسيا ادام قۇقىقتارى مەن بوستاندىقتارىن ەڭ جوعارعى قۇندىلىق رەتىندە بەكىتەدى. ولاردى قامتاماسىز ەتۋگە ارنالعان كەپىلدىكتەر جۇيەسى كونستيتۋتسيالىق قۇرىلىمنىڭ نەگىزىن قۇراپ، نەگىزگى زاڭعا ەنگىزىلەتىن وزگەرىستەردىڭ شەگىن ايقىندايدى. وسىعان بايلانىستى كونستيتۋتسيالىق سوت نەگىزگى زاڭعا قاتىستى كەز كەلگەن وزگەرىس ولاردىڭ جۇيەلىلىگى مەن بۇكىل كونستيتۋتسيالىق مودەلدىڭ جۇمىس ىستەۋىنە اسەرىن ەسكەرە وتىرىپ قاراستىرىلۋى قاجەت ەكەنىن اتاپ ءوتتى.
قۇقىقتار مەن بوستاندىقتارعا قاتىستى كەرى كەتۋدى (non-regress) بولدىرماۋعا ەرەكشە كوڭىل ءبولىنۋى ءتيىس، ويتكەنى ولاردىڭ تۇراقتىلىعى مەن ساباقتاستىعى ادام مەن ونىڭ قادىر-قاسيەتىنىڭ كونستيتۋتسيالىق تۇرعىدا بەكىتىلگەن باسىمدىعىنىڭ مازمۇنىن قۇرايدى»،- دەلىنگەن حابارلامادا.
وسى تۇرعىدا كونستيتۋتسيالىق باقىلاۋ ورگانى ءولىم جازاسىنا تىيىم سالۋ جانە ءومىر ءسۇرۋ قۇقىعىنىڭ باسىمدىعىن مويىنداۋ تەك قۇقىقتىق نورمالار عانا ەمەس، سونىمەن بىرگە اسا ماڭىزدى قۇندىلىقتىق ولشەم ەكەنىن اتاپ ءوتتى.
بۇعان قوسا، قىرعىزستاننىڭ حالىقارالىق مىندەتتەمەلەرى بار ەكەنى كورسەتىلگەن. ۆەنا كونۆەنتسياسىنا سايكەس، مەملەكەت حالىقارالىق شارتتاردى ورىنداماۋ ءۇشىن ىشكى زاڭناماسىنا جۇگىنە المايدى، ال شارتتى توقتاتۋ نەمەسە ۋاقىتشا توقتاتا تۇرۋ تەك قاتاڭ بەلگىلەنگەن جاعدايلاردا عانا مۇمكىن.
كونستيتۋتسيالىق جانە حالىقارالىق-قۇقىقتىق دالەلدەردىڭ جيىنتىعىن ەسكەرە وتىرىپ، كونستيتۋتسيالىق سوت ءولىم جازاسىن كونستيتۋتسيالىق تۇزەتۋ ارقىلى قايتارۋ نەگىزگى زاڭعا قايشى، جول بەرىلمەيتىن جانە قۇقىقتىق تۇرعىدا مۇمكىن ەمەس دەگەن شەشىم شىعاردى.
ايتا كەتەيىك، 1 قازاندا ەل پرەزيدەنتى سادىر جاپاروۆ قىرعىزستان 2007 جىلى باس تارتقان ءولىم جازاسىن قايتارۋعا قاتىستى زاڭنامالىق وزگەرىستەردى دايىنداۋدى تاپسىرعان بولاتىن. بۇل شەشىم 17 جاستاعى قىزدىڭ رەزونانستى ولىمىنە بايلانىستى قابىلدانعان. پارلامەنت ماقۇلداعان جاعدايدا ءولىم جازاسىن قايتارۋ تۋرالى زاڭ جوباسىن رەفەرەندۋمعا شىعارۋ جوسپارلانعان ەدى.
