قىرعىزستاننىڭ توتەنشە جاعدايلار ءمينيسترى قاناتبەك چىنىباەۆ ەل پرەزيدەنتى سادىر جاپاروۆتىڭ قاتاڭ سوگىسىن الدى. ال ۆەدومستۆو باسشىسىنىڭ ورىنباسارى المازبەك اسانوۆ ۇكىمەت شەشىمىمەن قىزمەتىنەن بوساتىلدى. مۇنداي شەشىم الا-ارچا تاۋىندا قازا تاپقان 14 جاستاعى ءامىر كۋناكۋنوۆتىڭ ولىمىنەن كەيىن قابىلدانعان، دەپ حابارلايدى «ادىرنا» ءتىلشىسى.
«اكيpress» اگەنتتىگىنىڭ مالىمەتىنشە، توتەنشە جاعدايلار مينيسترلىگىندەگى تاعى ەكى قىزمەتكەر قىزمەتىنەن بوساتىلعان. ولار – داعدارىستىق جاعدايلاردى باسقارۋ ورتالىعىنىڭ باسشىسى ازيس ەگەمبەرديەۆ پەن قۇتقارۋشىلاردى دايارلاۋ مەملەكەتتىك ورتالىعىنىڭ جەتەكشىسى تىناربەك مۋراشوۆ.
شەنەۋنىكتەردى قىزمەتىنەن بوساتۋ قىرعىزستان پرەزيدەنتى اكىمشىلىگى جۇرگىزگەن تەكسەرۋ قورىتىندىسى بويىنشا جۇزەگە اسقان. تەكسەرۋ بارىسىندا ۆەدومستۆو جۇمىسىندا بىرقاتار ەلەۋلى كەمشىلىك انىقتالعان. اتاپ ايتقاندا، توتەنشە جاعدايلارعا جەدەل ارەكەت ەتۋ جانە ىزدەستىرۋ جۇمىستارىن ۇيلەستىرۋ باعىتىندا ولقىلىقتار بولعان.
ايتا كەتەيىك، بۇعان دەيىن المازبەك اسانوۆ ۆەدومستۆو قىزمەتكەرلەرى ءجاسوسپىرىمنىڭ ولىمىنە بايلانىستى مورالدىق جاۋاپكەرشىلىكتى سەزىنەتىنىن مويىنداعان ەدى. سونىمەن قاتار ول ءامىر كۋناكۋنوۆتى قۇتقارۋ وپەراتسياسىنا اۆياتسيانى تارتۋ تۋرالى شەشىمنىڭ نە سەبەپتى كەش قابىلدانعانىن ءتۇسىندىردى.
شەنەۋنىكتىڭ ايتۋىنشا، تاۋدا جوعالعان ادامداردى ىزدەۋ جۇمىستارى اۋەلى جەردەگى قۇتقارۋ توپتارىنىڭ كومەگىمەن جۇرگىزىلەدى. كەيىن وقيعانىڭ سيپاتى مەن اۋا رايى جاعدايىنا قاراي تىكۇشاقتار تارتىلادى. سونداي-اق اسانوۆ توتەنشە جاعدايلار مينيسترلىگى قىزمەتكەرلەرىنىڭ ارەكەتىنە باعا بەرۋ ءۇشىن ىشكى تەكسەرۋ جۇرگىزەتىنىن مالىمدەگەن بولاتىن.
11 قاراشادا قىرعىزستاننىڭ اسكەري پروكۋراتۋراسى «الا-ارچا» ۇلتتىق تابيعي پاركىندە ءامىر كۋناكۋنوۆتىڭ قازا بولۋىنا بايلانىستى قىزمەتتىك سالعىرتتىق دەرەگى بويىنشا قىلمىستىق ءىس قوزعاعانى بەلگىلى بولدى. كۇدىكتىلەردىڭ انىقتالعان-انىقتالماعانى جونىندە ازىرگە قوسىمشا اقپارات جاريالانعان جوق.
14 جاستاعى ءجاسوسپىرىمنىڭ ءولىمى 7 قاراشادا بولعان. تاۋدان ءتۇسىپ كەلە جاتىپ اداسىپ كەتكەنىن تۇسىنگەن كۋناكۋنوۆ جەدەل قىزمەتتەردىڭ بىرىڭعاي نومىرىنە قوڭىراۋ شالعان. توتەنشە جاعدايلار مينيسترلىگىنىڭ قىزمەتكەرلەرى گەولوكاتسيا ارقىلى بالانىڭ ناقتى ورنالاسقان جەرىن انىقتاعان. الايدا كەزەكشى قۇتقارۋ توبىنا بۇل اقپارات كەش جەتكەن. ولار ءامىردىڭ كومەك سۇراعان قوڭىراۋىنان ءۇش ساعات وتكەن سوڭ عانا حاباردار بولعان. ۆەدومستۆو وكىلدەرى مۇنى تاۋلى ايماقتا ۇيالى بايلانىستىڭ بولماۋىمەن ءتۇسىندىردى.
ىزدەستىرۋ-قۇتقارۋ جۇمىستارى ەكى كۇن بويى جالعاسقان. 9 قاراشادا ءامىردىڭ دەنەسى ەلەكترو شىڭى ماڭىنان تابىلدى. الدىن الا مالىمەت بويىنشا، ءجاسوسپىرىم قاتتى توڭىپ، گيپوتەرميا سالدارىنان قازا تاپقان.
