Qyrǧyzstannyŋ Tötenşe jaǧdailar ministrı Qanatbek Chynybaev el prezidentı Sadyr Japarovtyŋ qataŋ sögısın aldy. Al vedomstvo basşysynyŋ orynbasary Almazbek Asanov ükımet şeşımımen qyzmetınen bosatyldy. Mūndai şeşım Ala-Archa tauynda qaza tapqan 14 jastaǧy Ämır Kunakunovtyŋ ölımınen keiın qabyldanǧan, dep habarlaidy «Adyrna» tılşısı.
«AKİpress» agenttıgınıŋ mälımetınşe, Tötenşe jaǧdailar ministrlıgındegı taǧy ekı qyzmetker qyzmetınen bosatylǧan. Olar – Daǧdarystyq jaǧdailardy basqaru ortalyǧynyŋ basşysy Azis Egemberdiev pen Qūtqaruşylardy daiarlau memlekettık ortalyǧynyŋ jetekşısı Tynarbek Muraşov.
Şeneunıkterdı qyzmetınen bosatu Qyrǧyzstan prezidentı äkımşılıgı jürgızgen tekseru qorytyndysy boiynşa jüzege asqan. Tekseru barysynda vedomstvo jūmysynda bırqatar eleulı kemşılık anyqtalǧan. Atap aitqanda, tötenşe jaǧdailarǧa jedel äreket etu jäne ızdestıru jūmystaryn üilestıru baǧytynda olqylyqtar bolǧan.
Aita keteiık, būǧan deiın Almazbek Asanov vedomstvo qyzmetkerlerı jasöspırımnıŋ ölımıne bailanysty moraldyq jauapkerşılıktı sezınetının moiyndaǧan edı. Sonymen qatar ol Ämır Kunakunovty qūtqaru operasiiasyna aviasiiany tartu turaly şeşımnıŋ ne sebeptı keş qabyldanǧanyn tüsındırdı.
Şeneunıktıŋ aituynşa, tauda joǧalǧan adamdardy ızdeu jūmystary äuelı jerdegı qūtqaru toptarynyŋ kömegımen jürgızıledı. Keiın oqiǧanyŋ sipaty men aua raiy jaǧdaiyna qarai tıkūşaqtar tartylady. Sondai-aq Asanov Tötenşe jaǧdailar ministrlıgı qyzmetkerlerınıŋ äreketıne baǧa beru üşın ışkı tekseru jürgızetının mälımdegen bolatyn.
11 qaraşada Qyrǧyzstannyŋ Äskeri prokuraturasy «Ala-Archa» ūlttyq tabiǧi parkınde Ämır Kunakunovtyŋ qaza boluyna bailanysty qyzmettık salǧyrttyq deregı boiynşa qylmystyq ıs qozǧaǧany belgılı boldy. Küdıktılerdıŋ anyqtalǧan-anyqtalmaǧany jönınde äzırge qosymşa aqparat jariialanǧan joq.
14 jastaǧy jasöspırımnıŋ ölımı 7 qaraşada bolǧan. Taudan tüsıp kele jatyp adasyp ketkenın tüsıngen Kunakunov jedel qyzmetterdıŋ bıryŋǧai nömırıne qoŋyrau şalǧan. Tötenşe jaǧdailar ministrlıgınıŋ qyzmetkerlerı geolokasiia arqyly balanyŋ naqty ornalasqan jerın anyqtaǧan. Alaida kezekşı qūtqaru tobyna būl aqparat keş jetken. Olar Ämırdıŋ kömek sūraǧan qoŋyrauynan üş saǧat ötken soŋ ǧana habardar bolǧan. Vedomstvo ökılderı mūny tauly aimaqta ūialy bailanystyŋ bolmauymen tüsındırdı.
Izdestıru-qūtqaru jūmystary ekı kün boiy jalǧasqan. 9 qaraşada Ämırdıŋ denesı Elektro şyŋy maŋynan tabyldy. Aldyn ala mälımet boiynşa, jasöspırım qatty toŋyp, gipotermiia saldarynan qaza tapqan.
