قىرعىزستان پرەزيدەنتى سادىر جاپاروۆ ۇقمك-ءنىڭ بۇرىنعى توراعاسى قامشىبەك تاشيەۆتىڭ وتستاۆكاعا كەتۋىنە قاتىستى تاعى دا پىكىر ءبىلدىردى، - دەپ حابارلايدى "ادىرنا" پورتالى 24.kg-عا سىلتەمە جاساپ.
اقپاراتقا سايكەس، سادىر جاپاروۆ قامشىبەك تاشيەۆپەن قىزمەتىنەن كەتكەننەن كەيىن جەكە كەزدەسكەن.
"دوس بولىپ قالا بەرەمىز. بىراق ول مەملەكەتتىك قىزمەتكە قايتىپ ورالمايدى، دەمالىپ، دەنساۋلىعىن قاراۋى كەرەك", - دەدى سادىر جاپاروۆ.
سادىر جاپاروۆ كادرلىق شەشىمدەردى ءوزى قابىلداعانىن، بۇل قانداي دا ءبىر سىرتقى قىسىممەن بايلانىستى ەمەس ەكەنىن مالىمدەدى. ول قۇقىق قورعاۋ جۇيەسىندە جوسپارلانعان رەفورمالار جالعاساتىنىن ايتتى.
ەسكە سالساق،10 اقپاندا قامشىبەك تاشيەۆتىڭ قىرعىزستان مينيسترلەر كابينەتىنىڭ توراعاسىنىڭ ورىنباسارى – ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) توراعاسى قىزمەتىنەن بوساتىلعانى بەلگىلى بولدى. ءتيىستى جارلىققا رەسپۋبليكا پرەزيدەنتى سادىر جاپاروۆ قول قويعان.
قىرعىزستان پرەزيدەنتىنىڭ ءباسپاسوز قىزمەتىنىڭ حابارلاۋىنشا، سادىر جاپاروۆ "بۇل قادامنىڭ باستى ماقساتى - مەملەكەتتىڭ بىرلىگىن نىعايتۋ جانە قوعامدا، سونىڭ ىشىندە مەملەكەتتىك قۇرىلىمدار اراسىندا دا، جىككە ءبولىنۋدىڭ الدىن الۋ" ەكەنىن ايتقان.
الايدا كەيىنىرەك پرەزيدەنتتىڭ ءباسپاسوز حاتشىسى شيەلەنىستى تاشيەۆ ەمەس، ونىڭ جاقىن اينالاسىنداعى ادامدار تۋعىزعانىن حابارلادى. ولار دەپۋتاتتارعا قوڭىراۋ شالىپ، "گەنەرالدىڭ جاعىنا شىعۋعا" جانە "پرەزيدەنتتىڭ جاڭا سايلاۋىن باستامالاۋعا" ۇگىتتەگەن.
