7 اقپان كۇنى اقتاۋ ماڭىنداعى ۇشاق اپاتىندا قازا بولعانداردى ەسكە الۋ شاراسى ءوتتى. بۇل ءىس-شارانى قازاقستاننىڭ ازەربايجانداعى ەلشىلىگى مەن ماڭعىستاۋ وبلىسىنىڭ اكىمدىگى ۇيىمداستىردى، دەپ حابارلايدى “ادىرنا” ۇلتتىق پورتالى.
شاراعا ماڭعىستاۋ وبلىسىنىڭ اكىمى نۇرداۋلە قيلىباي، قازاقستاننىڭ ازەربايجانداعى ەلشىسى ءالىم بايەل، ازەربايجاننىڭ قازاقستانداعى ەلشىسى اگالار اتاموگلانوۆ، ازەربايجاننىڭ اقتاۋداعى باس كونسۋلى ايحان سۋلەيمانلى، قازا تاپقان قازاقستاندىقتاردىڭ تۋىستارى، ازەربايجان دياسپوراسىنىڭ وكىلدەرى، قۇتقارۋ جۇمىستارىنا قاتىسقان مەكەمەلەردىڭ وكىلدەرى جانە اقتاۋ قالاسىنىڭ تۇرعىندارى قاتىستى. ءىس-شارانىڭ باسىندا قۇراننان اياتتار وقىلدى.
ماڭعىستاۋ وبلىسىنىڭ اكىمى نۇردايۋلەت قيلىباي قازا بولعانداردىڭ تۋىستارىنا كوڭىل ايتىپ، قازاقستان پرەزيدەنتى قاسىم-جومارت توقاەۆتىڭ تاپسىرماسىمەن اپاتتىڭ سالدارىن جويۋ جانە سەبەپتەرىن انىقتاۋ، زارداپ شەككەندەرگە كومەك كورسەتۋ ءۇشىن ۇكىمەتتىك كوميسسيا قۇرىلعانىن اتاپ ءوتتى. قازاقستاننىڭ ۋاكىلەتتى ورگاندارى، ونىڭ ىشىندە ماڭعىستاۋ وبلىسىنىڭ اكىمدىگى تراگەديا كۇندەرى بارلىق قاجەتتى شارالاردى قابىلدادى. قيلىباي قۇتقارۋشىلارعا، دارىگەرلەرگە جانە جانى اشىعان بارلىق قازاقستاندىقتارعا تاعى دا العىس ايتتى.
قازاقستاننىڭ ازەربايجانداعى ەلشىسى ءالىم بايەل بۇگىنگى تاڭدا قازاقستان مەن ازەربايجان اراسىنداعى قاتىناستار شىن مانىندە وداقتاستىق سيپات العانىن اتاپ ءوتتى. ول قازاقستان مەن ازەربايجاننىڭ كاسپي تەڭىزىنىڭ شىعىس جانە باتىس جاعالاۋلارىندا ورنالاسقانىن جانە تۇركى الەمىندە ماڭىزدى ويىنشىلار بولىپ تابىلاتىنىن، سونداي-اق ەۋرازيالىق كولىك-لوگيستيكا ارحيتەكتۋراسىنىڭ نەگىزگى بۋىندارى ەكەنىن اتاپ ءوتتى.
بايەل ازەربايجان پرەزيدەنتى يلحام اليەۆتىڭ سوزدەرىن ەسكە الدى، وندا ول ەكى ەل اراسىنداعى دوستىق پەن باۋىرلاستىقتىڭ تراگەديادان كەيىن نىعايعانىن ايتقان بولاتىن. وسى كونتەكستە ول قازاقستان تاراپىنا ازەربايجاندىق كاسىپكەر ءاميل يۋسيفوۆتىڭ قازا بولعانداردىڭ وتباسىلارىنا كومەك كورسەتۋ تۋرالى ۇسىنىسىن ريزاشىلىقپەن قابىلداعانىن ايتتى. ءوز كەزەگىندە ازەربايجاندىق كاسىپكەر قازاقستاندا تابىستى بيزنەس جۇرگىزىپ، باۋىرلاس حالىققا كومەك كورسەتۋ ءوز مىندەتى دەپ اتاپ ءوتتى.
شارا بارىسىندا ءاميل يۋسيفوۆ قازا بولعان قازاقستاندىقتاردىڭ تۋىستارىنا الماتى قالاسىنداعى جاڭا تۇرعىن ءۇي كەشەنىنەن 5 ەكى بولمەلى پاتەردىڭ كىلتتەرىن تاپسىردى. پاتەرلەر جيھازبەن جانە تۇرمىستىق تەحنيكامەن جابدىقتالعان. سونىمەن قاتار، مەتسەنات ماڭعىستاۋ وبلىسى تج دەپارتامەنتىنە، اقتاۋ قالاسىنىڭ اۋرۋحاناسى مەن جەدەل جاردەم ستانتسياسىنا ءۇش جاڭا كولىك سىيلادى.
قازا بولعانداردىڭ تۋىستارى مەن زارداپ شەككەندەرگە كومەك كورسەتكەن مەكەمەلەردىڭ قىزمەتكەرلەرى ازەربايجاندىق كاسىپكەرگە العىس ايتتى. وبلىس اكىمى ماڭعىستاۋ وبلىسى جۇرتشىلىعى اتىنان العىس ءبىلدىرىپ، بۇل ءىس-شارانىڭ قازاق-ازەربايجان دوستىعىنىڭ تاعى ءبىر ۇلگىسى بولعانىن ەرەكشە اتاپ ءوتتى.
