قازاقستان پرەزيدەنتى قاسىم-جومارت توقاەۆ قازاق تىلىندە پايدا بولعان كەيبىر جاساندى سوزدەردىڭ قولدانىسىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
مەملەكەت باسشىسى ولاردىڭ بىرقاتارىنىڭ قاجەتتىلىگى كۇمان تۋدىراتىنىن ايتىپ، تىلدىك نورمالاردى رەتتەۋ ماسەلەسىنە نازار اۋداردى. بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى «قازاق ءتىلى» حالىقارالىق قوعامىنىڭ X سەزىندە سويلەگەن سوزىندە تىلدىك جاڭاشىلدىقتا شەكتەن شىقپاۋ كەرەكتىگىن اتاپ ءوتتى.
«كۇيساندىق» (پيانينو), «قىلتيما» (بالكون), «سۋبۇرقاق» (فونتان), «سەبەزگى» (دۋش), «قىرىققابات» (كاپۋستا), «ۇنقاعاز» (گازەت), «جەدەلساتى» (ليفت), «جەلكوز» (فورتوچكا) سياقتى جاساندى سوزدەردىڭ پايدا بولۋى كۇمان تۋدىرادى. بارلىق نارسەدە شاما بولۋى كەرەك»، – دەدى پرەزيدەنت.
سونىمەن قاتار قاسىم-جومارت توقاەۆ سوڭعى جىلدارى كۇندەلىكتى قولدانىسقا كەڭىنەن ەنگەن بىرقاتار قازاقشا ءسوزدى اتاپ ءوتتى. ولاردىڭ قاتارىندا «جانارماي»، «عالامتور»، «تىكۇشاق»، «پايىز»، «تۇجىرىمداما»، «قاعيدات»، «جوسپار» جانە «عارىش» سوزدەرى بار.
پرەزيدەنت ءدىني ۇعىمدارعا قاتىستى ءداستۇرلى قازاق سوزدەرىن اراب تىلىنەن ەنگەن بالامالارمەن الماستىرۋ ۇردىسىنە دە توقتالدى. ونىڭ ايتۋىنشا، مۇنداي وزگەرىستەردىڭ قاجەتتىلىگىنە قاتىستى سۇراقتار بار. وسى ماسەلەنى جان-جاقتى زەردەلەۋ ءۇشىن ءتىل ماماندارى، ساراپشىلار مەن قوعام وكىلدەرىنەن ارنايى جۇمىس توبىن قۇرۋدى ۇسىندى. ونىڭ جۇمىسىن مەملەكەت باسشىسىنىڭ اكىمشىلىگى ۇيلەستىرەدى.
بۇدان بولەك، پرەزيدەنت ءتىل ءبىلىمى سالاسىندا بىرىڭعاي ءارى بارشاعا قولجەتىمدى تسيفرلىق جۇيە ازىرلەۋ جانە ورفوگرافيالىق سوزدىكتى قوسا العاندا، بارلىق سوزدىكتى جاڭارتۋ قاجەتتىگىن ايتتى.
مەملەكەت باسشىسىنىڭ سوزىنشە، قازاق ءتىلىنىڭ ورفوگرافيالىق نورمالارىن 2027 جىلدىڭ سوڭىنا دەيىن بىرىزدەندىرۋ قاجەت. ول رەسمي بەكىتىلگەن ورفوگرافيالىق سوزدىك 1983 جىلى جارىق كورگەنىن، ال كەيىنگى نۇسقالارى مەملەكەتتىك دەڭگەيدە ماقۇلدانباعانىن ەسكە سالدى.
سونداي-اق قاسىم-جومارت توقاەۆ ءتىل ماسەلەسىن قوعامدا الاۋىزدىق تۋعىزۋ ءۇشىن پايدالانۋعا بولمايتىنىن ەسكەرتتى. مەملەكەتتىك ءتىل ەل بىرلىگىن نىعايتۋدىڭ نەگىزگى فاكتورلارىنىڭ ءبىرى بولۋى كەرەك. الايدا قازاق ءتىلىن دامىتۋ وزگە تىلدەردىڭ دامۋىنا كەدەرگى كەلتىرمەۋگە ءتيىس.
ء«بىر ءتىلدى ەكىنشى تىلگە قارسى قويۋعا بولمايدى. بۇل – ۇلكەن كۇنا. ونىڭ زاردابىن ءوز كوزىمىزبەن كورىپ وتىرمىز»، – دەپ اتاپ ءوتتى پرەزيدەنت.
