مەملەكەت باسشىسى قاسىم-جومارت توقاەۆ «بەيبىتشىلىك پەن قۇقىققا نەگىزدەلگەن بولاشاق» اتتى كونستيتۋتسيالىق سوت تورەلىگىنىڭ حالىقارالىق فورۋمىنا قاتىسۋشىلارمەن كەزدەستى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
باسقوسۋعا ۆەنەتسيا كوميسسياسىنىڭ پرەزيدەنتى كلەر بازي مالوري، ءباا جوعارعى فەدەرالدىق سوتىنىڭ توراعاسى مۇحاممەد حاماد مۇحاممەد ءال بادي ءال زاحري، افريكا كونستيتۋتسيالىق يۋريسديكتسيا ورگاندارى كونفەرەنتسياسىنىڭ توراعاسى ليۋك مالابا جانە موڭعوليا كونستيتۋتسيالىق سوتىنىڭ توراعاسى باياسگالان گۋنگاا قاتىستى.
پرەزيدەنت قوناقتارعا العىسىن ءبىلدىرىپ، قازاقستاندا جۇرگىزىلىپ جاتقان ساياسي، ەكونوميكالىق جانە كونستيتۋتسيالىق رەفورمالار تۋرالى ايتتى. ول اتا زاڭعا ەنگىزىلگەن وزگەرىستەر وكىلدى بيلىك تارماعى مەن قۇقىق قورعاۋ ينستيتۋتتارىنىڭ ءرولىن كۇشەيتىپ، اتقارۋشى بيلىكتىڭ ەسەپ بەرۋ مىندەتىن ارتتىرعانىن اتاپ ءوتتى.
«كۇشتى پرەزيدەنت — ىقپالدى پارلامەنت — ەسەپ بەرەتىن ۇكىمەت» قاعيداتى ساقتالادى. پارلامەنتتىك رەسپۋبليكاعا اينالۋ ماسەلەسى كۇن تارتىبىندە تۇرعان جوق. جالپىۇلتتىق رەفەرەندۋمدار حالىقتىڭ ەل تاعدىرىنا قاتىستى شەشىمدەرگە قاتىسۋىنا جول اشادى»، — دەدى قاسىم-جومارت توقاەۆ.
سونىمەن قاتار، مەملەكەت باسشىسى جۋىردا قازاقستان حالقىنا ارناعان جولداۋىنداعى باسىمدىقتارعا توقتالدى. ونىڭ ايتۋىنشا، ەلدى تەحنولوگيالىق تۇرعىدان وزىق مەملەكەتكە اينالدىرۋ باستى ماقسات بولىپ قالا بەرەدى. بۇل رەتتە جاساندى ينتەللەكت پەن تسيفرلاندىرۋ جاڭا ۇلتتىق يدەياعا اينالادى.
