ۆەنەسۋەلادا بيلىك پەن وپپوزيتسيا اراسىنداعى ۇلتتىق تاتۋلاسۋ جونىندەگى العاشقى كەلىسسوزدەردەن كەيىن 131 ساياسي تۇتقىن بوستاندىققا شىقتى، دەپ حابارلايدى "ادىرنا" ءتىلشىسى DW-عا سىلتەپ.
ەل ۇكىمەتىنىڭ مالىمەتىنشە، بوساتىلعان ازاماتتار بۇعان دەيىن قىلمىس جاسادى دەگەن كۇدىكپەن نەمەسە قىلمىسقا قاتىسى بار دەگەن نەگىزبەن قاماۋعا الىنعان. ولارعا باس بوستاندىعىنان ايىرۋدىڭ ورنىنا ەركىندىگىن شەكتەيتىن بالاما شارالار قولدانىلعان. الايدا بيلىك بۇل شارالاردىڭ ناقتى قانداي ەكەنىن ازىرگە جاريالاعان جوق. وپپوزيتسيا دەلەگاتسياسىن باسقاراتىن ساياساتكەر دينورا فيگەرا بوساتىلعانداردىڭ بارلىعى تولىق ەركىندىككە شىعۋى قاجەت ەكەنىن ايتتى.
«بارلىعى بوساتىلعان جوق، بىراق ولاردىڭ بارلىعى تولىق بوستاندىققا لايىق. ءار ازامات وتباسىمەن قايتا قاۋىشقانعا دەيىن بۇل تالاپتى جالعاستىرا بەرەمىز»، – دەدى ول.
اقش مەملەكەتتىك حاتشىسى ماركو رۋبيو 131 ادامنىڭ بوساتىلۋىن ۆەنەسۋەلاداعى ۇلتتىق تاتۋلاسۋ جولىنداعى ماڭىزدى قادام دەپ باعالادى. ونىڭ ايتۋىنشا، جىل باسىنان بەرى ەلدە بارلىعى 1046 ساياسي تۇتقىن بوساتىلعان. بيلىك پەن وپپوزيتسيا اراسىنداعى كەلىسسوزدەردىڭ العاشقى راۋندى 12 تامىزدا اياقتالدى. كەزدەسۋ بارىسىندا تاراپتار بىرقاتار ماسەلە بويىنشا ورتاق پىكىرگە كەلگەن. سونىڭ ىشىندە ەلدەگى سوت جۇيەسىن رەفورمالاۋ تۋرالى كەلىسىم جاسالدى. اقش ۆەنەسۋەلا ۇكىمەتى مەن وپپوزيتسيا اراسىنداعى كەلىسسوزدەردى قولداپ وتىر. ۆاشينگتوننىڭ قىسىمىنان كەيىن ۆەنەسۋەلانىڭ ۋاقىتشا پرەزيدەنتى دەلسي رودريگەس ۇلتتىق ديالوگ باستالعانعا دەيىن راقىمشىلىق تۋرالى زاڭعا قول قويعان. سونىڭ ناتيجەسىندە بۇعان دەيىن بىرنەشە ءجۇز ساياسي تۇتقىن بوساتىلعان.
