اقش رەسەيدىڭ ەكى ءىرى مۇناي كومپانياسىنا قارسى جاڭا سانكتسيالار ەنگىزدى

اقش-تىڭ قارجى مينيسترلىگى رەسەيگە سانكتسيا سالدى، دەپ حابارلايدى "ادىرنا" ۇلتتىق پورتالى DW-عا سىلتەپ.

ۋكرايناداعى سوعىستى توقتاتۋعا «ايتارلىقتاي قىزىعۋشىلىق تانىتپاعانىنا» بايلانىستى «روسنەفت» پەن «لۋكويل» مۇناي كومپانيالارىنا قوسىمشا سانكتسيالار سالدى. بۇل تۋرالى ۆەدومستۆونىڭ ءباسپاسوز قىزمەتى حابارلادى.

اقش قارجى ءمينيسترى سكوتت بەسسەنتتىڭ ايتۋىنشا، بۇل قادام رەسەيدىڭ اسكەري ماشيناسىن قارجىلاندىرىپ وتىرعان نەگىزگى ەنەرگيا كومپانيالارىن تەجەۋگە باعىتتالعان.

«پرەزيدەنت پۋتين بۇل ماعىناسىز سوعىستى توقتاتۋدان باس تارتقاندىقتان، قارجى مينيسترلىگى كرەملدىڭ سوعىس ماشيناسىن قارجىلاندىراتىن ەكى ءىرى رەسەيلىك مۇناي كومپانياسىنا سانكتسيالار ەنگىزەدى»، – دەدى سكوتت بەسسەنت.

سانكتسيالار تەك كومپانيالارعا عانا ەمەس، ولاردىڭ 34 ەنشىلەس قۇرىلىمىنا دا (ونىڭ 28-ءى — «روسنەفتكە»، ال 6-ى — «لۋكويلعا» تيەسىلى) تارالادى. ەندى بۇل ۇيىمداردىڭ اقش-تاعى بارلىق اكتيۆتەرى بۇعاتتالادى. ال امەريكالىق جانە شەتەلدىك ازاماتتارعا ولارعا قىزمەت كورسەتۋگە تىيىم سالىنادى.

بۇعان قوسا، اقش بولاشاقتا دا رەسەيگە قارسى جاڭا شەكتەۋ شارالارىن قابىلداۋعا دايىن ەكەنىن مالىمدەدى جانە ءوز وداقتاستارىن وسى باستامانى قولداۋعا شاقىردى.

ايتا كەتەيىك، بۇعان دەيىن، 15 قازاندا ۇلىبريتانيا دا «روسنەفت» پەن «لۋكويلعا» قارسى سانكتسيالار ەنگىزگەن. بۇل شارالار اكتيۆتەردى بۇعاتتاۋ، سەنىمگەرلىك جانە كولىك قىزمەتتەرىن شەكتەۋدى قامتيدى. سونىمەن قاتار، «روسنەفتكە» تيەسىلى كەمەلەردىڭ ۇلىبريتانيا پورتتارىنا كىرۋىنە جانە اۋە كەڭىستىگىن پايدالانۋعا تىيىم سالىندى.