ترامپ اكىمشىلىگى اقش-تان ءوز ەركىمەن كەتەتىن ميگرانتتارعا 1000 دوللار بەرىپ، جول پۇلىنا كومەكتەسەتىنىن ءمالىم ەتتى. بۇل تۋرالى Reuters جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، اقش-تىڭ ىشكى قاۋىپسىزدىك مينيسترلىگى ءبىر ميگرانتتىڭ ۇستاپ، ماجبۇرلەپ دەپورتاتسيالاۋعا 17 000 دوللار شىعىن كەتەتىنىن ايتىپ، اتالعان شارانىڭ ۇكىمەت ءۇشىن تيىمدىرەك ەكەنىن اتادى.
امەريكا پرەزيدەنتى دونالد ترامپ قاڭتاردا قىزمەتكە كىرىسكەن كەزدە ميلليونداعان ادامدى دەپورتاتسيالاۋعا ۋادە بەرگەن، بىراق وزىنەن بۇرىنعى پرەزيدەنتدجو بايدەننەن ارتتا قالىپ وتىر. بايدەن اكىمشىلىگى زاڭسىز يمميگراتسيا كوبەيگەن كەزدە، ماسەلەمەن بەتپە-بەت كەلىپ، شەكارادان وتكەن كوپتەگەن ادامدى كەرى قايتارعان بولاتىن.
مينيسترلىكتىڭ مالىمەتىنە سايكەس، ترامپ اكىمشىلىگى 20 قاڭتاردان بەرى 152 000 ادامدى ەلدەن شىعارعان. ال وتكەن جىلدىڭ اقپان مەن ءساۋىر ارالىعىندا بايدەن بيلىگى تۇسىندا 195 000 ادام دەپورتاتسيالانعان ەدى.
ترامپ اكىمشىلىگى ميگرانتتاردى ەلدەن ءوز ەركىمەن كەتۋگە ىنتالاندىرۋ ءۇشىن بىرقاتار شارا قابىلدادى. ونىڭ ىشىندە ءىرى ايىپپۇلدار سالۋ، زاڭدى مارتەبەدەن ايىرۋ، سونداي-اق ميگرانتتاردى گۋانتانامو شىعاناعى مەن سالۆادورداعى اتىشۋلى تۇرمەلەرگە جابۋ بار.
ناۋرىز ايىندا بيلىك «CBP Home» دەپ اتالاتىن ارنايى ءموبيلدى قوسىمشانى ىسكە قوستى. بۇرىن بايدەن اكىمشىلىگى بۇل قوسىمشانى «CBP One» دەپ اتاپ، ميگرانتتاردىڭ زاڭدى تۇردە ەلگە كىرۋىن رەتتەۋ ءۇشىن پايدالانعان. ەندى بۇل قوسىمشا ءوز ەركىمەن كەتكىسى كەلەتىندەرگە ارنالىپ وتىر.
ءساۋىر ايىندا ترامپ ءوز ەركىمەن ەلدەن كەتەتىندەرگە ارنالعان باعدارلاماسىن جاريالاپ، كەيىن ولاردىڭ اقش-قا قايتىپ كەلۋىنە مۇمكىندىك بەرىلەتىنىن ايتقان، الايدا مينيسترلىك ونىڭ قالاي جۇزەگە اساتىنىن ناقتى تۇسىندىرمەدى.
ميگرانتتاردىڭ قۇقىعىن قورعايتىن Make the Road New York ۇيىمىنىڭ وكىلى ناتاليا اريستيسابال بۇل باعدارلامانى سىنعا الىپ، «قاتاڭ ءارى تۇسىنىكسىز» دەپ اتادى. ول ميگرانتتاردىڭ اقش-قا قايتا ورالعاندا قيىن كەدەرگىلەرگە ۇشىرايتىنىن بيلىكتىڭ ەسكەرمەي وتىرعانىن ايتتى.
ۇقساس جاڭالىقتار
