ازەربايجان استاناسى باكۋدىڭ ورتالىعىندا 24 جىل بۇرىن جاسالعان كىسى ءولتىرۋ قىلمىسى اشىلدى. تەرگەۋ ناتيجەسىندە قىلمىسقا كۇدىكتى ازامات انىقتالىپ، قاماۋعا الىنعان. بۇل تۋرالى ازەربايجان باس پروكۋراتۋراسى مەن ىشكى ىستەر مينيسترلىگىنىڭ بىرلەسكەن مالىمدەمەسىندە ايتىلعان، دەپ حابارلايدى “ادىرنا” ۇلتتىق پورتالى Caliber.Az سايتىنا سىلتەپ.
مالىمەتكە سايكەس، 2002 جىلى 7 قازاندا ناسيمي اۋدانىنىڭ پروكۋراتۋراسى قاساقانا كىسى ءولتىرۋ دەرەگى بويىنشا قىلمىستىق ءىس قوزعاعان. سول كۇنى ازەربايجان مەملەكەتتىك مۇناي جانە ونەركاسىپ ۋنيۆەرسيتەتىنىڭ (ول كەزدە ازەربايجان مەملەكەتتىك مۇناي اكادەمياسى) اكىمشىلىك عيماراتىنىڭ اۋلاسىندا كۇزەتشى مۇحاممەدالي ماگەرراموۆ پىشاق جاراقاتىنان قازا تاپقان. سونىمەن قاتار وقۋ ورنىنىڭ اكىمشىلىك عيماراتىنان ءتۇرلى زاتتار ۇرلانعان.
ول كەزدە قىلمىسكەردى انىقتاۋ مۇمكىن بولماعان. الايدا قازىرگى تەرگەۋ بارىسىندا قىلمىستى 1979 جىلى تۋعان ۆۋگار راگيم وگلۋ دجاحانگيروۆ جاساعانى بەلگىلى بولدى. ول 1997 جىلى اتالعان جوعارى وقۋ ورنىنان شىعارىلعان جانە بۇعان دەيىن ءتۇرلى قىلمىستار ءۇشىن بىرنەشە رەت سوتتالعان.
كۇدىكتى 2026 جىلعى 4 قاراشادا ۇستالىپ، 6 قاراشادا وعان بىرقاتار باپ بويىنشا ايىپ تاعىلعان. اتاپ ايتقاندا، قىزمەتتىك مىندەتىن اتقارىپ جۇرگەن ادامدى پايداكۇنەمدىك ماقساتپەن جانە وزگە قىلمىستى جاسىرۋ ءۇشىن قاساقانا ءولتىردى دەگەن ايىپتار تاعىلعان.
قازىرگى ۋاقىتتا قىلمىستىق ءىس بويىنشا تەرگەۋ جالعاسىپ جاتىر.
