ازەربايجان مەن ارمەنيانىڭ سىرتقى ىستەر مينيسترلىكتەرى ابۋ-دابيدە ەكى ەلدىڭ باسشىلارى يلحام اليەۆ پەن نيكول پاشينياننىڭ كەزدەسۋىنىڭ قورىتىندىسى بويىنشا مالىمدەمە تاراتتى. بۇل تۋرالى Euronews جازدى، دەپ حابارلايدى “ادىرنا”.
مالىمدەمەدە اليەۆ پەن پاشينيان «مەملەكەتارالىق قاتىناستاردى قالىپقا كەلتىرۋدىڭ ءتۇرلى اسپەكتىلەرىن تالقىلادى» دەپ ايتىلعان. قۇجاتتا «ليدەرلەر شەكارانى دەليميتاتسيالاۋ پروتسەسىندەگى پروگرەسستى اتاپ ءوتىپ، ءتيىستى مەملەكەتتىك كوميسسيالارعا بۇل باعىتتاعى پراكتيكالىق جۇمىستاردى جالعاستىرۋدى تاپسىردى جانە ەكى ەل اراسىندا سەنىمدى نىعايتۋ ءۇشىن ەكىجاقتى كەلىسسوزدەر مەن شارالاردى جالعاستىرۋعا كەلىستى» دەلىنگەن.
بۇل — ارمەنيا مەن ازەربايجان باسشىلارىنىڭ ءتورت ونجىلدىققا سوزىلعان قاقتىعىستان كەيىن بەيبىت كەلىسىم ءماتىنىنىڭ جوباسىن كەلىسىپ، ءبىرىنشى رەت رەسمي ەكىجاقتى كەزدەسۋى.
تەلەديدار حابارلاماسىندا ايتىلعانداي، وسى كەزدەسۋدىڭ ناتيجەلەرى وڭتۇستىك كاۆكازدىڭ بولاشاعىن انىقتايدى. بۇل تەك ەكى ەلدىڭ باسشىلارى كەلىسەتىن ماسەلەلەرگە عانا ەمەس، سونىمەن قاتار رەسەيدىڭ ارميان-ازەربايجان قاقتىعىسىن رەتتەۋگە العاش رەت قاتىسپايتىنىنا دا بايلانىستى.
«رەسەيدىڭ ۋكرايناعا جاساعان ءساتسىز شابۋىلىنان كەيىن، رەسەي وڭتۇستىك كاۆكازداعى ىقپالىن جوعالتا باستادى»، - دەدى ەرەۆانداعى تاۋەلسىز اناليتيكالىق ورتالىقتىڭ ايماقتىق زەرتتەۋلەر ورتالىعىنىڭ ديرەكتورى ريچارد گيراگوسيان.
Euronews حابارلاعانداي، بۇل وزگەرىس ماسكەۋدىڭ باستاماسىمەن بولمايدى. باكۋ مەن ەرەۆان كرەملدەن الىستاپ، رەسەيمەن قارىم-قاتىناستارى سوڭعى بىرنەشە جىلدا ايتارلىقتاي ناشارلاعانىن ايتتى.
«ۋكراينادا باتىپ كەتكەن ماسكەۋ بىرتىندەپ پوستسوۆەتتىك كەڭىستىكتەگى ىقپالىن جوعالتۋدا. بۇل تۇرعىدا ەڭ ايقىن وزگەرىس – رەسەيدىڭ بىرنەشە ونجىلدىقتار بويى وڭتۇستىك كاۆكازداعى ىقپالىنان ايىرىلۋى»، - دەلىنگەن تەلەارنا سيۋجەتىندە.
«ارمەنيا مەن ازەربايجان يرونيالىق تۇرعىدا بىردەي ماقساتتى بولىسۋدە - ماسكەۋگە قارسى ساياساتتى جۇرگىزىپ، رەسەيدى وڭتۇستىك كاۆكازدان ىعىستىرۋدا»، - دەدى گيراگوسيان.
