شەشەنستان بيلىگى رامزان قادىروۆتىڭ تاپسىرماسىمەن باكۋ–گروزنىي باعىتى بويىنشا ۇشىپ بارا جاتقان AZAL اۋە كومپانياسىنىڭ ۇشاعى اپاتقا ۇشىراعاننان كەيىن زارداپ شەككەن جانە قازا تاپقانداردىڭ وتباسىلارىنا قارجىلاي جانە باسقا دا كومەك كورسەتۋگە دايىن ەكەنىن مالىمدەگەن بولاتىن. الايدا ازەربايجان ەشقانداي كومەكتى قاجەت ەتپەيتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى ازەربايجان پرەزيدەنتى اكىمشىلىگىنىڭ Day.Az اگەنتتىگىنە بەرگەن مالىمدەمەسىندە ايتىلدى.
«ازەربايجان ەشقانداي كومەكتى قاجەت ەتپەيدى. مەملەكەت تە، ازاماتتار دا بۇل كومەكتى قابىلدامايدى. ءبىز ءوز ازاماتتارىمىزعا قاجەتتى كومەكتى كورسەتىپ كەلەمىز جانە كورسەتۋدى جالعاستىرامىز. ازەربايجان وقيعانىڭ مويىندالۋىن، كەشىرىم سۇراۋدى جانە ءتيىستى وتەماقى تولەۋدى تالاپ ەتەدى»، – دەپ حابارلادى ازەربايجان پرەزيدەنتى اكىمشىلىگىندەگى دەرەككوز.
2024 جىلعى 25 جەلتوقساندا AZAL اۋە كومپانياسىنىڭ Embraer 190 ۇشاعى باكۋ–گروزنىي باعىتىندا ۇشىپ بارا جاتىپ، اقتاۋ اۋەجايىنان 3 شاقىرىم جەردە اپاتقا ۇشىرادى.
ۇشاق بورتىندا 67 ادام بولدى. ونىڭ 62-ءسى جولاۋشى جانە 5 ەكيپاج مۇشەسى.
اپاتتان كەيىن اۋرۋحاناعا 27 ادام جەتكىزىلدى. ولاردىڭ ىشىندە:
- 15 ادام – ازەربايجان رەسپۋبليكاسىنىڭ ازاماتتارى;
- 8 ادام – رەسەي فەدەراتسياسىنىڭ ازاماتتارى;
- 3 ادام – قىرعىز رەسپۋبليكاسىنىڭ ازاماتتارى.
ءبىر ادامنىڭ جەكە باسى ءالى انىقتالعان جوق.
ەكيپاجدىڭ ەكى پيلوتى جانە ءبىر بورتسەرىك قازا تاپتى، ەكى ەكيپاج مۇشەسى ءتىرى قالدى.
26 جەلتوقساندا ازەربايجانعا 14 زارداپ شەگۋشى مەن ءتورت قازا تاپقان ادامنىڭ دەنەسى ازەربايجانعا جەتكىزىلدى.
