ازەربايجان ءسىم CNN جاريالاعان ەل اۋماعىنىڭ يرانعا قارسى وپەراتسيالاردا پايدالانىلعانى تۋرالى مالىمەتتەردى تەرىسكە شىعارىپ، اقپاراتتى رەسمي تۇردە جوققا شىعارۋدى تالاپ ەتتى، دەپ حابارلايدى "ادىرنا" ۇلتتىق پورتالى DW-عا سىلتەپ.
بۇل تۋرالى ازەربايجان ءسىم رەسمي وكىلى ايحان گادجيزادە مالىمدەدى. ونىڭ ايتۋىنشا، ماقالادا ازەربايجان اۋماعى يرانعا قارسى اسكەري نەمەسە بارلاۋ وپەراتسيالارىندا پايدالانىلدى دەگەن جانە ەلدە يزرايل كۇشتەرى ورنالاسقان دەگەن مالىمدەمەلەر شىندىققا جاناسپايدى. ايحان گادجيزادە مۇنداي اقپاراتتاردىڭ بۇعان دەيىن دە بىرنەشە رەت جوققا شىعارىلعانىن اتاپ ءوتتى. سونداي-اق ازەربايجاننىڭ رەسمي ۇستانىمى CNN رەداكتسياسىنا ولاردىڭ ساۋالىنا جاۋاپ رەتىندە الدىن الا جەتكىزىلگەنىن ايتتى.
ءسىم وكىلىنىڭ سوزىنشە، ناقتى دالەلدەرسىز، ءانونيمدى دەرەككوزدەرگە سۇيەنە وتىرىپ جانە ازەربايجاننىڭ رەسمي پوزيتسياسىن ەسكەرمەي مۇنداي مالىمدەمەلەر جاريالاۋ وبەكتيۆتىلىك، بەيتاراپتىق جانە جۋرناليستىك ەتيكا قاعيداتتارىنا قايشى كەلەدى.
«ازەربايجان اۋماعىنىڭ قانداي دا ءبىر ءۇشىنشى مەملەكەتكە قارسى اسكەري وپەراتسيالار، بارلاۋ قىزمەتى نەمەسە وزگە دە دۇشپاندىق ماقساتتار ءۇشىن پايدالانىلىپ جاتقانى تۋرالى مالىمدەمەلەرگە ەشقانداي نەگىز جوق. ەلىمىز مۇنداي ارەكەتتەرگە ەشقاشان جول بەرگەن ەمەس جانە بەرمەيدى»، – دەدى ايحان گادجيزادە.
ونىڭ ايتۋىنشا، ازەربايجان وڭىردەگى بەيبىتشىلىككە، تۇراقتىلىققا جانە تاتۋ كورشىلىك قاتىناستاردى دامىتۋعا بەيىلدى. ءسىم وكىلى اتالعان جاريالانىمدى كەزەكتى جالعان اقپارات تاراتۋ ارەكەتى دەپ باعالاپ، CNN-نەن نەگىزسىز مالىمدەمەلەر قامتىلعان ماقالانى جوققا شىعارۋدى كۇتەتىندەرىن جەتكىزدى.
