قازاقستاندىق دارىگەر، پروفەسسور سەرىك مەيىرمانوۆ جاپونياداعى بەدەلدى ريتسۋمەيكان ازيا-تىنىق مۇحيتى ۋنيۆەرسيتەتىنىڭ (Ritsumeikan Asia Pacific University – APU) ۆيتسە-پرەزيدەنتى (پرورەكتورى) قىزمەتىنە تاعايىندالدى. بۇل تۋرالى Facebook جەلىسىندە ولجاس بەركىنباەۆ حابارلادى، دەپ جازادى “ادىرنا”.
بۇل – قازاقستان ازاماتىنىڭ جاپونيا جوعارى وقۋ ورنىنىڭ باسشىلىعىنداعى وسىنداي جوعارى لاۋازىمعا العاش رەت تاعايىندالۋى. اتالعان ۋنيۆەرسيتەت جاپونيانىڭ بەپپۋ قالاسىندا ورنالاسقان.
سەرىك مەيىرمانوۆ بۇعان دەيىن ءۇش جىل بويى ۋنيۆەرسيتەتتىڭ اكادەميالىق ماسەلەلەر جونىندەگى دەكانى قىزمەتىن اتقارعان. ول جوعارى مەديتسينالىق ءبىلىمدى قازاقستاندا الىپ، PhD عىلىمي دارەجەسىن جاپونيادا قورعاعان.
سونىمەن قاتار پروفەسسور قازاقستان رەسپۋبليكاسى پرەزيدەنتى جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ مۇشەسى. سونداي-اق ۇلتتىق عىلىمي كەڭەس قۇرامىندا شەتەلدىك ساراپشى رەتىندە جۇمىس ىستەيدى.
