جاپونيا ورمۇز بۇعازىنىڭ ءىس جۇزىندە جابىلۋىنا بايلانىستى تۋىنداعان ەنەرگەتيكالىق داعدارىس جاعدايىندا قازاقستاندى مۇناي يمپورتتايتىن نەگىزگى بالاما باعىتتاردىڭ ءبىرى رەتىندە قاراستىرۋدا، دەپ حابارلايدى "ادىرنا" ۇلتتىق پورتالى.
لوگيستيكانى قايتا قاراۋعا اقش پەن ءيزرايلدىڭ يرانعا قارسى 28 اقپاندا باستاعان اسكەري ارەكەتتەرى سەبەپ بولعان. وسىدان كەيىن يران ورمۇز بۇعازىن اتالعان ەلدەردىڭ كەمەلەرى ءۇشىن جاۋىپ، ايماقتاعى نەگىزگى كومىرسۋتەك تاسىمالى باعىتتارىن شەكتەگەن. قازىرگى تاڭدا جاپونيا تۇتىناتىن مۇنايدىڭ 94%-ى تاياۋ شىعىستان جەتكىزىلەدى.
ەڭ ىقتيمال نۇسقالاردىڭ ءبىرى رەتىندە INPEX كورپوراتسياسىنىڭ قازاقستانداعى جوبالارىنان وندىرىلەتىن مۇناي كولەمىن قايتا باعىتتاۋ قاراستىرىلۋدا. كومپانيانىڭ كاپيتالىنا جاپونيا مەملەكەتى قاتىسادى. سونىمەن قاتار، INPEX ازەربايجان مەن اۆسترالياداعى كەن ورىندارىنان جەتكىزىلىمدەردى قايتا باعدارلاۋ مۇمكىندىگىن دە زەرتتەپ جاتىر.
ساراپشىلاردىڭ پىكىرىنشە، كاسپي وڭىرىنەن جەتكىزۋ باعىتتارى پارسى شىعاناعىمەن سالىستىرعاندا ۇزاعىراق، سوندىقتان بۇل وتىننىڭ تۇپكىلىكتى باعاسىنا اسەر ەتۋى مۇمكىن.
ۇزاق مەرزىمدى شەشىمدەر ىزدەستىرۋ اياسىندا توكيو جەدەل شارالاردى دا قولعا الدى. 16 ناۋرىزدان باستاپ جاپونيا مەملەكەتتىك مۇناي قورلارىن پايدالانۋعا كىرىسىپ، نارىققا 80 ميلليون باررەل شىعاردى. بۇل كولەم ەلدىڭ شامامەن 45 كۇندىك تۇتىنۋىنا تەڭ.
