ماماندىق تاڭداۋدا جىنىسقا قاتىستى شەكتەۋ بولماۋى كەرەك.
وسى ۇستانىمدى دارىپتەۋ ماقساتىندا شىمكەنت قالاسىنداعى دوستىق ۇيىندە «ماماندىققا شەكتەۋ جوق – مۇمكىندىك بارىنە ورتاق» اتتى كورمە ۇيىمداستىرىلدى. تۇران اۋدانى اكىمى اپپاراتىنىڭ الەۋمەتتىك قورعاۋعا قولداۋ كورسەتۋ ءبولىمىنىڭ باسشىسى تالعات ءسالىننىڭ ايتۋىنشا، كورمەنىڭ نەگىزگى ماقساتى – گەندەرلىك تەڭدىكتى ناسيحاتتاۋ، جاستارعا ماماندىق تاڭداۋدا ءار ادامنىڭ قابىلەتى مەن قىزىعۋشىلىعى باستى ورىندا ەكەنىن كورسەتۋ. سونىمەن قاتار كاسىپكەرلىك پەن زاماناۋي تەحنولوگيالاردى دارىپتەۋ، ەرەكشە ءبىلىم بەرۋدى قاجەت ەتەتىن بالالاردى قولداۋ كوزدەلگەن.
تۇران اۋدانى اكىمىنىڭ اپپاراتىنىڭ باستاماسىمەن وتكەن كورمەگە اۋدان اۋماعىندا ورنالاسقان ءتورت كوللەدجدىڭ ستۋدەنتتەرى قاتىسىپ، كاسىبي داعدىلارى مەن شىعارماشىلىق جۇمىستارىن كوپشىلىك نازارىنا ۇسىندى. اتاپ ايتساق، ءا. قاستەەۆ اتىنداعى ونەر جانە ديزاين كوللەدجىنىڭ جاستارى كارتينالار، ساندىك بۇيىمدار مەن دەكوراتيۆتى كومپوزيتسيالارىن تانىستىرسا، ميراس كوللەدجىنىڭ ستۋدەنتتەرى تۋريزم، ءسان جانە سۇلۋلىق سالالارىنداعى جۇمىستارىن كورسەتتى.
تەحنيكالىق باعىتتا جول-كولىك كوللەدجىنىڭ ستۋدەنتتەرى ماشينيست جانە تەحنيك-ەلەكترومەحانيك ماماندىقتارىنا قاتىستى قۇرال-جابدىقتاردى تانىستىردى. كوللەدجدىڭ جول قوزعالىسىن ۇيىمداستىرۋ ماماندىعىنىڭ ەكىنشى كۋرس ستۋدەنتى دينارا وسپان اۆتوماتتى بولشەكتەپ، قايتا جيناۋ ارقىلى كاسىبي شەبەرلىگىن كورسەتتى. دينارا اۆتوماتتى كوزىن جۇمىپ 45 سەكۋندتا شاشىپ، قايتا جيناي الادى. ال كوزى اشىق كەزدە 9 سەكۋندتا بولشەكتەپ، 20 سەكۋندتا قايتا قۇراستىرادى.
– كوپشىلىك بۇل ماماندىقتى ەر بالالارعا ءتان دەپ ويلايدى. مەن بۇل پىكىرمەن كەلىسپەيمىن. قىز بالالاردىڭ دا وسى سالادا جۇمىس ىستەي الاتىنىن دالەلدەگىم كەلەدى. بولاشاقتا جوعارى ءبىلىم الىپ، ماماندىعىم بويىنشا ەلىمە قىزمەت ەتكىم كەلەدى، – دەيدى دينارا.
يندۋستريالدى-تەحنيكالىق كوللەدجدىڭ ستۋدەنتتەرى قۇرالداردى قولدانۋ تاسىلدەرىن ءتۇسىندىرىپ، دانەكەرلەۋ تەحنولوگياسىمەن جاسالعان بۇيىمدارىن كورسەتتى. توكار ستانوگىندا دايىندالعان جۇمىستار دا كورمەگە قويىلدى.
قۇتقارۋ جانە قاۋىپسىزدىك سالالارىنىڭ مۇمكىندىكتەرى دە نازاردان تىس قالمادى. توتەنشە جاعدايلار دەپارتامەنتىنىڭ وكىلدەرى قۇتقارۋشىلاردىڭ ارنايى كيىمدەرى مەن قۇرال-جابدىقتارىن تانىستىردى. قۇتقارۋشى بولۋدى ماقسات ەتكەن جاستار ارنايى ەكيپيروۆكانى كيۋ ءتارتىبىن كورسەتىپ، توتەنشە جاعداي كەزىندە حالىققا پسيحولوگيالىق جانە ەموتسيونالدىق تۇرعىدا قولداۋ كورسەتۋدىڭ ماڭىزىن ءتۇسىندىردى.
كورمەدە ەرەكشە ءبىلىم بەرۋدى قاجەت ەتەتىن بالالاردىڭ شىعارماشىلىعىنا دا ورىن بەرىلدى. قالالىق ەستۋ قابىلەتى بۇزىلعان بالالارعا ارنالعان №1 ارنايى مەكتەپ-ينتەرناتىنىڭ 10-سىنىپ وقۋشىسى كاۋسار ورىنباسار ءوزى جاساعان قولونەر بۇيىمدارىن ۇسىندى. ول جەتى جاسىنان باستاپ قولونەرمەن اينالىسادى. ەپوكسيدتى شايىردان ۇلتتىق ويۋ-ورنەك پىشىنىندەگى تۇيرەۋىشتەر جاسايتىن جاس شەبەر بولاشاقتا ديزاينەر بولۋدى ارماندايدى.
كورمە باعدارلاماسى ءسان كورسەتىلىمدەرىمەن جالعاستى. جيىن سوڭىندا ستۋدەنتتەر ارنايى العىس حاتتارمەن ماراپاتتالدى. 
