فوتو: Reuters
اقش-تا ءوتىپ جاتقان كونگرەستىڭ ارالىق سايلاۋ ناتيجەلەرى ەلدىڭ ساياسي ومىرىندە ەلەۋلى وزگەرىستەرگە جول اشۋى مۇمكىن. الدىن الا بولجامدارعا سايكەس، دەموكراتيالىق پارتيا وكىلدەر پالاتاسى مەن سەناتتاعى باسىمدىقتى رەسپۋبليكاشىلداردان تارتىپ الۋعا جاقىن. بۇل دونالد ترامپ اكىمشىلىگىنىڭ الداعى ەكى جىلداعى جۇمىسىنا ايتارلىقتاي ىقپال ەتۋى ىقتيمال، دەپ حابارلايدى "ادىرنا".
BBC-ءدىڭ مەدياسەرىكتەسى CBS News مالىمەتىنشە, دەموكراتتار وكىلدەر پالاتاسىنداعى ءبىراز ورىندى يەلەنەدى دەپ كۇتىلۋدە. ال سەناتتا پارتيا وكىلدەرى كەمىندە 51 ورىنعا قول جەتكىزۋى مۇمكىن. ايوۆا شتاتىندا دەموكرات دجوش تۋرەكتىڭ جەڭىسكە جەتۋى پارتيانىڭ سەناتتاعى باسىمدىعىن قامتاماسىز ەتۋگە مۇمكىندىك بەرگەن.
سايلاۋدىڭ الدىن الا قورىتىندىلارى رەسپۋبليكاشىلدار ءۇشىن كۇتپەگەن جاعداي بولدى. ويتكەنى دەموكراتتار بۇعان دەيىن قارسىلاستارىنىڭ ءداستۇرلى تىرەگى سانالعان بىرنەشە شتاتتا جەڭىسكە جەتتى.
ماسەلەن، تەحاس شتاتىندا دەموكرات دجەيمس تالاريكو رەسپۋبليكاشىل كەن پاكستوننان باسىم ءتۇستى. بۇل شتاتتا دەموكراتتار سوڭعى 30 جىلدان استام ۋاقىت بويى مۇنداي جەڭىسكە جەتە الماعان. وڭتۇستىك كارولينادا ەنني ەندريۋس رەسپۋبليكاشىل سەناتور دارلين گرەمدى جەڭسە، وگايودا دەموكرات شەررود براۋن سەناتتاعى ورىندى يەلەندى.
ترامپ اكىمشىلىگىن قانداي وزگەرىستەر كۇتىپ تۇر؟
دەموكراتتاردىڭ ەكى پالاتادا دا باسىمدىققا يە بولۋى دونالد ترامپتىڭ زاڭنامالىق باستامالارىن جۇزەگە اسىرۋىن قيىنداتۋى مۇمكىن. سونىمەن قاتار پرەزيدەنت اكىمشىلىگىنىڭ قىزمەتىنە قاتىستى تەرگەۋلەردىڭ كوبەيۋىنە جول اشىلادى.
كونگرەستەگى كوپشىلىك ورىن دەموكراتتارعا بىرنەشە ماڭىزدى مۇمكىندىك بەرەدى. ولار اق ءۇي ۇسىنعان زاڭ جوبالارىنىڭ قابىلدانۋىنا توسقاۋىل قويىپ، اكىمشىلىككە قاتىستى داۋلى ماسەلەلەر بويىنشا ارنايى تەرگەۋلەر جۇرگىزە الادى. سونداي-اق جاۋاپتى تۇلعالاردى كوميتەت وتىرىستارىنا شاقىرىپ، كوپشىلىك الدىندا تۇسىنىكتەمە تالاپ ەتۋگە قۇقىلى.
بۇدان بولەك، بيۋدجەت قاراجاتىن ءبولۋ ماسەلەسىندە دە دەموكراتتاردىڭ ىقپالى ارتادى. مىسالى، ولار ترامپ اكىمشىلىگىنىڭ يمميگراتسيا جانە كەدەندىك باقىلاۋ قىزمەتىنە (ICE) بولەتىن قارجىسىن ماقۇلداماۋى مۇمكىن. ال سەناتتاعى باسىمدىق فەدەرالدىق مينيسترلەر مەن سۋديالىققا ۇسىنىلعان كانديداتتاردى بەكىتۋگە دە اسەر ەتەدى.
دەگەنمەن دەموكراتتاردىڭ جەڭىسى ترامپتىڭ پرەزيدەنتتىك قىزمەتتەن بىردەن كەتۋىنە اكەلمەيدى. پرەزيدەنتكە يمپيچمەنت جاريالانعان كۇننىڭ وزىندە ونى قىزمەتىنەن شەتتەتۋ ءۇشىن سەناتتاعى 100 سەناتوردىڭ كەمىندە 67-ءسىنىڭ قولداۋى قاجەت. قازىرگى بولجام بويىنشا، دەموكراتتاردىڭ مۇنداي باسىمدىققا قول جەتكىزۋى ەكىتالاي.
اقش پرەزيدەنتى دونالد ترامپ سايلاۋدىڭ الدىن الا ناتيجەسىنە قاتىستى Truth Social الەۋمەتتىك جەلىسىندە پىكىر ءبىلدىردى. ول ءوزىنىڭ ەسىمى بيۋللەتەندەردە بولماعانىن ايتىپ، ەگەر ءوزى سايلاۋعا قاتىسقاندا، رەسپۋبليكاشىلدار سەنىمدى جەڭىسكە جەتەر ەدى دەگەن ويىن جەتكىزدى.
كەيىن The New York Times باسىلىمىنا بەرگەن سۇحباتىندا ترامپ سايلاۋ ناتيجەلەرىن قابىلداۋعا جانە ساياسي قارسىلاستارىمەن بىرلەسە جۇمىس ىستەۋگە دايىن ەكەنىن مالىمدەدى.
ء«بىز ولارمەن ىنتىماقتاستىق ورناتۋعا دايىنبىز. بالكىم، ورتاق كەلىسىمگە كەلەتىن ماسەلەلەر دە تابىلار»، – دەدى ول.
جاڭادان سايلانعان كونگرەسسمەندەر مەن سەناتورلار 2027 جىلدىڭ قاڭتار ايىنىڭ باسىندا قىزمەتىنە كىرىسەدى.
