الماتى وبلىسىندا Chevrolet Cobalt كولىگىنىڭ جۇرگىزۋشىسى كوپقاباتتى ءۇيدىڭ اۋلاسىندا ەكى بالانى قاعىپ كەتتى، دەپ حابارلايدى “ادىرنا”.
جول-كولىك وقيعاسى 4 قىركۇيەك كۇنى ساعات 18:20 شاماسىندا تالعار اۋدانىنىڭ بەساعاش اۋىلىنداعى ء«نۇريا» تۇرعىن ءۇي كەشەنىنىڭ اۋماعىندا بولعان.
جەرگىلىكتى تۇرعىنداردىڭ ايتۋىنشا، كولىك شامامەن 40 كم/ساع جىلدامدىقپەن قوزعالعان بولۋى مۇمكىن. الايدا بۇل اقپارات ازىرگە رەسمي تۇردە راستالعان جوق.
كۋاگەرلەردىڭ سوزىنشە، وقيعادان كەيىن زارداپ شەككەن قىزداردىڭ ءبىرى ءبىراز ۋاقىت ەس-ءتۇسسىز جاتقان.
«پوليتسيا قىزمەتكەرلەرى ەكى كامەلەتكە تولماعان جاياۋ جۇرگىنشىنى قاعىپ كەتكەن Chevrolet Cobalt كولىگىنىڭ 25 جاستاعى جۇرگىزۋشىسىن جاۋاپكەرشىلىككە تارتتى. سوقتىعىس سالدارىنان بالالار ءتۇرلى دەنە جاراقاتتارىن الىپ، قاجەتتى مەديتسينالىق كومەك كورسەتۋ ءۇشىن مەديتسينالىق مەكەمەگە جەتكىزىلدى»، – دەپ حابارلادى الماتى وبلىسىنىڭ پوليتسياسى.
پوليتسيا جۇرگىزۋشىلەردى جول قوزعالىسى ەرەجەلەرىن قاتاڭ ساقتاۋعا، اسىرەسە بالالار بولۋى مۇمكىن تۇرعىن ءۇي اۋلالارى مەن ەلدى مەكەندەر اۋماعىندا كولىك جۇرگىزۋ كەزىندە بارىنشا ساق بولۋعا شاقىردى.
