پاكىستان قازاقستانمەن ساۋدا-ەكونوميكالىق ىنتىماقتاستىقتى كەڭەيتۋ اياسىندا پورتتى پايدالانۋعا بەرۋگە دايىن، دەپ حابارلايدى “ادىرنا” ۇلتتىق پورتالى.
جەرگىلىكتى باق دەرەگىنشە، ماسەلە قازاقستاننىڭ پاكىستانداعى ەلشىسى ەرجان قىستافين مەن پاكىستاننىڭ تەڭىز ىستەرى ءمينيسترى مۇحامماد ءچاۋدحريدىڭ كەزدەسۋىندە تالقىلاندى. كەلىسسوزدەر بارىسىندا يسلاماباد قازاقستانعا كاراچي، كاسيم جانە گۆادار پورتتارىن ەكسپورتتىق جۇكتەردى تاسىمالداۋ ءۇشىن پايدالانۋدى ۇسىندى.
تاراپتار پاكىستاننىڭ ارنايى ەكونوميكالىق ايماقتارىنداعى بىرلەسكەن جوبالاردى دامىتۋ مۇمكىندىكتەرىن جانە كەدەندىك راسىمدەردى جەڭىلدەتۋ ماسەلەلەرىن قاراستىردى.
پاكىستان تاراپى مۇنداي مۇمكىندىكتىڭ تەك قازاقستانعا عانا ەمەس، ورتالىق ازيانىڭ باسقا مەملەكەتتەرىنە دە قولجەتىمدى بولاتىنىن اتاپ ءوتتى. بۇل ءوز كەزەگىندە ءوڭىر ەلدەرىنىڭ پارسى شىعاناعى، افريكا جانە وڭتۇستىك-شىعىس ازيا نارىقتارىنا شىعۋىنا قوسىمشا مۇمكىندىك بەرەدى.
كەزدەسۋ قورىتىندىسى بويىنشا تاراپتار كولىك-لوگيستيكالىق باعىتتاردى دامىتۋ جانە ساۋدا بايلانىستارىن نىعايتۋ بويىنشا ىنتىماقتاستىقتى جالعاستىرۋعا ۋاعدالاستى.
