فوتو: oxu.az
تۇركيا بىرىككەن ۇلتتار ۇيىمىنىڭ (بۇۇ) باس حاتشىسى لاۋازىمىنا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) قازىرگى باس حاتشىسى، بۇرىنعى سىرتقى ىستەر ءمينيسترى فەريدۋن سينيرليوعلۋدىڭ كانديداتۋراسىن رەسمي تۇردە ۇسىندى. بۇل تۋرالى تۇركيانىڭ بۇۇ جانىنداعى تۇراقتى وكىلى احمەت يىلدىز Anadolu اگەنتتىگىنە مالىمدەگەن، دەپ حابارلايدى "ادىرنا".
ونىڭ ايتۋىنشا، كانديداتۋرانى ۇسىنۋ تۋرالى حات بۇۇ باس اسسامبلەياسىنىڭ توراعاسىنا جولدانعان.
ديپلوماتتىڭ سوزىنشە، تۇركيا پرەزيدەنتى رەجەپ تايپ ەردوعان فەريدۋن سينيرليوعلۋدىڭ كاسىبي بىلىكتىلىگىن، حالىقارالىق تاجىريبەسىن جانە وعان دەگەن سەنىمدى ەسكەرە وتىرىپ، بۇل كانديداتۋرانى ۇسىنۋدى ءجون كورگەن.
احمەت يىلدىز قازىرگى ۋاقىتتا بۇۇ باس حاتشىسى لاۋازىمىنا قاتىستى ورتاق كەلىسىلگەن كانديداتتىڭ جوق ەكەنىن اتاپ ءوتتى. وسىعان بايلانىستى تۇركيا ۇيىمنىڭ جۇمىسىنا قولداۋ كورسەتۋ ماقساتىندا ءوز ۇمىتكەرىن ۇسىنعان.
سونداي-اق انكارا لاتىن امەريكاسى مەن كاريب باسسەينى ەلدەرىنەن كانديدات ۇسىنۋ ءداستۇرىن قۇرمەتتەيتىنىن جەتكىزدى. ديپلوماتتىڭ ايتۋىنشا، تۇركيا وسى ۋاقىتقا دەيىن ءدال وسى سەبەپپەن ۇمىتكەر ۇسىنۋعا اسىقپاعان.
ايتا كەتەيىك، فەريدۋن سينيرليوعلۋ 2015 جىلدىڭ تامىزىنان قاراشاسىنا دەيىن تۇركيانىڭ سىرتقى ىستەر ءمينيسترى قىزمەتىن اتقارعان. ال 2016–2023 جىلدارى ەلدىڭ بۇۇ جانىنداعى تۇراقتى وكىلى بولعان. قازىرگى ۋاقىتتا ەقىۇ باس حاتشىسى قىزمەتىن اتقارىپ كەلەدى.
