ىستانبۇل سوتى يزرايل پرەمەر-ءمينيسترى بينيامين نەتانياحۋعا ادامزاتقا قارسى قىلمىستار جاسادى دەگەن ايىپپەن قاماۋعا الۋ تۋرالى وردەر بەردى. بۇل تۋرالى Turkiye Today باسىلىمى جازدى، دەپ حابارلايدى «ادىرنا» ءتىلشىسى.
سوت پروكۋراتۋرانىڭ ونى حالىقارالىق ىزدەۋگە جاريالاۋ ءۇشىن ينتەرپولعا سۇراۋ جولداۋ تۋرالى ءوتىنىشىن قاناعاتتاندىرعان.
شەشىم بينيامين نەتانياحۋ مەن ءيزرايلدىڭ باسقا دا لاۋازىمدى تۇلعالارىنا قارسى بەرىلگەن تالاپ-ارىزدى قاراۋ قورىتىندىسى بويىنشا قابىلدانعان. تالاپ-ارىز 2025 جىلدىڭ قازان ايىندا يزرايل بيلىگى گازا سەكتورىنا بارا جاتقان كەزدە توقتاتقان «بوستاندىق فلوتيلياسى» وقيعاسىنا بايلانىستى قوزعالعان.
2025 جىلدىڭ قاراشاسىندا ىستانبۇل سوتى وسى ءىس بويىنشا بينيامين نەتانياحۋ مەن ءيزرايلدىڭ وزگە دە رەسمي وكىلدەرىن قاماۋعا الۋ تۋرالى الدىن الا وردەر شىعارعان بولاتىن. ايىپتار تىزىمىنە گەنوتسيد، قاساقانا زيان كەلتىرۋ، ازاپتاۋ، اۋىرلاتاتىن ءمان-جايلارداعى توناۋ، مۇلىكتى ءبۇلدىرۋ، زاڭسىز باس بوستاندىعىنان ايىرۋ جانە كولىك قۇرالدارىن ايداپ اكەتۋ باپتارى ەنگىزىلگەن.
بيىل ءساۋىر ايىندا ىستانبۇل پروكۋراتۋراسى ءىس فيگۋرانتتارىن اۋىرلاتاتىن ءمان-جايلارمەن ءومىر بويىنا باس بوستاندىعىنان ايىرۋدى سۇراعان. ۆەدومستۆونىڭ مالىمەتىنشە، حالىقارالىق تەڭىز قۇقىعى نورمالارىنا سايكەس تۇرىك سوتتارى بۇل ءىستى قاراۋعا يۋريسديكتسياعا يە.
