قازاقستاننىڭ سىرتقى ىستەر مينيسترلىگى تۇركيانىڭ الانيا اۋماعىندا بولعان جول اپاتىندا زارداپ شەككەن قازاقستاندىقتار تۋرالى مالىمدەمە جاسادى، دەپ حابارلايدى “ادىرنا” ۇلتتىق پورتالى.
تۇركياداعى قازاقستان ەلشىسى وقيعانىڭ بارلىق ءمان-جايىن انىقتاۋ ءۇشىن الانياعا باردى.
30 شىلدە كۇنى تاڭەرتەڭ الانيادا قازاقستاننىڭ 12 ازاماتىن تاسىمالداعان شاعىن اۆتوبۋستىڭ جول-كولىك وقيعاسىنا ۇشىرادى. تۇرىك پوليتسياسىنان الىنعان الدىن-الا مالىمەت بويىنشا، اۆتوبۋس جۇرگىزۋشىسى جوعارى جىلدامدىقپەن الدىنداعى جۇك كولىگىن سوققان. سوقتىعىسۋ سالدارىنان زارداپ شەككەندەر بار، ولار شۇعىل تۇردە جاقىن ماڭداعى اۋرۋحانالارعا جەتكىزىلدى، - دەلىنگەن حابارلامادا.
تۇرىك پوليتسياسىنىڭ اقپاراتى بويىنشا، اۆتوبۋس جۇرگىزۋشىسى قاتتى جىلدامدىقپەن كەلىپ، جۇك كولىگىنە سوقتىعىسقان. اپات سالدارىنان زارداپ شەككەندەر بار، ولار شۇعىل تۇردە جاقىن ماڭداعى اۋرۋحانالارعا جەتكىزىلگەن.
اپات كەزىندە جاراقات العان ەكى قازاقستاندىققا وتا جاسالعان.
ميكرواۆتوبۋستا بولعان 12 قازاقستاندىقتىڭ ەكەۋى اۋىرلىعى ورتاشا جاراقات العان. ولارعا وتا جاسالىپ، بارلىق قاجەتتى مەديتسينالىق كومەك كورسەتىلەدى. قالعان 10 وتانداستىڭ، ونىڭ ىشىندە 4 بالانىڭ جاعدايى قاناعاتتانارلىق، ومىرىنە ەش قاۋىپ جوق. بارلىعىنىڭ مەديتسينالىق ساقتاندىرۋى بار. انتالياداعى قازاقستاندىق ديپلوماتتار ءبىزدىڭ ازاماتتارمەن تۇراقتى بايلانىستا جانە ءتيىستى جۇمىس جۇرگىزۋدە، – دەپ مالىمدەدى مينيسترلىك وكىلدەرى.
ەسكە سالايىق، 30 شىلدەدە الانيادا قازاقستاننىڭ 12 ازاماتىن تاسىمالداعان شاعىن اۆتوبۋس جول اپاتىنا تۇسكەنىن حابارلاعان ەدىك. سالدارىنان ەكى ادام كوز جۇمعان.
