مەملەكەت باسشىسى قاسىم-جومارت توقاەۆ رەجەپ تايىپ ەردوعان «قوجا احمەت ياساۋي» وردەنىمەن ماراپاتتادى، دەپ حابارلايدى "ادىرنا" ۇلتتىق پورتالى.
پرەزيدەنت توقاەۆ تۇركيا كوشباسشىسىن الەمدىك دەڭگەيدەگى بەدەلدى ساياساتكەر، ادىلدىك پەن جاۋاپكەرشىلىك قاعيداتتارىن حالىقارالىق ارەنادا تاباندى تۇردە قورعاپ جۇرگەن قايراتكەر رەتىندە جوعارى باعالايتىنىن ايتتى.
ء"وزىڭىزدىڭ كورەگەن باستاماڭىزبەن قولعا الىنعان رەفورمالاردىڭ ناتيجەسىندە تۇركيا تۇراقتى دامىپ، ىقپالدى ءارى قۋاتتى مەملەكەتكە اينالدى. ءسىزدىڭ «الەم بەستەن ۇلكەن» تۇجىرىمداماڭىز حالىقارالىق قاتىناستارداعى تەڭسىزدىككە قارسى باتىل ۇندەۋ بولدى", – دەدى مەملەكەت باسشىسى.
سونداي-اق پرەزيدەنت ەردوعاننىڭ تۇركى الەمىنىڭ ىنتىماعىن نىعايتۋداعى رولىنە ەرەكشە توقتالىپ، ونىڭ قولداۋىمەن تۇركى مەملەكەتتەرى ۇيىمى قىسقا ۋاقىت ىشىندە ىقپالدى قۇرىلىمعا اينالعانىن اتاپ ءوتتى.
ء"بىزدىڭ تەگىمىز بەن ءدىنىمىز – ءبىر، ءدىلىمىز – ۇقساس. قازاق پەن تۇرىك حالقىنىڭ باۋىرلاستىعى بۇگىندە ستراتەگيالىق سەرىكتەستىككە ۇلاستى", – دەدى پرەزيدەنت.
مەملەكەت باسشىسى تۇركىستاندا وتەتىن تۇركى مەملەكەتتەرى ۇيىمىنىڭ بەيرەسمي ءسامميتى باۋىرلاس ەلدەردىڭ ىنتىماقتاستىعىن ودان ءارى ارتتىراتىنىنا سەنىم ءبىلدىردى.
