گەرمانيانىڭ ونداعان قالاسىندا جاستاردىڭ جاپپاي نارازىلىق اكتسيالارى ءوتىپ جاتىر، دەپ حابارلايدى “ادىرنا”.
DW دەرەگىنشە، بەرليندە پوليتسيا شامامەن 2 700, ميۋنحەندە 1 800, ال فرانكفۋرت-نا-ماينەدە 1 000-عا جۋىق دەمونسترانتتى تىركەگەن. ەل بويىنشا اكتسياعا قاتىسقانداردىڭ جالپى سانى ازىرگە جاريالانعان جوق.
نارازىلىق شارالارىنىڭ باسىم بولىگى بەيبىت جاعدايدا ءوتىپ جاتىر. الايدا شتۋتگارت قالاسىندا پوليتسيا شەرۋدى بىرنەشە رەت توقتاتۋعا ءماجبۇر بولعان. بۇعان اكتسيا باستالماي تۇرىپ ءتۇتىن شاشكالارىنىڭ قولدانىلۋى مەن پەتاردالاردىڭ جارىلۋى سەبەپ بولعان. سونىمەن قاتار پوليتسيا بەت-ءجۇزىن جاسىرعان شەرۋشىلەرگە ەسكەرتۋ جاساعان.
جاستاردىڭ نارازىلىعىنا ءومىر ءسۇرۋ قۇنىنىڭ ءوسۋى، گەرمانيادا مىندەتتى اسكەري قىزمەتتىڭ قايتا ەنگىزىلۋى مۇمكىندىگى جانە كليماتتىق ساياساتتىڭ تيىمسىزدىگى سەبەپ بولعان.
بەرلين، كەلن، فرانكفۋرت جانە ميۋنحەن قالالارىنداعى شەرۋلەردى «Gen Z regelt» («Z ۇرپاعى شەشەدى») قوزعالىسىمەن بايلانىستى ۇيىمداستىرۋ توبى ۇيلەستىرىپ وتىر. ال وزگە قالالارداعى اكتسيالارعا قاتىستى توپ ولاردىڭ ۇيىمداستىرىلۋى مەن مازمۇنىنا جاۋاپتى ەمەس ەكەنىن مالىمدەگەن. دەگەنمەن ۇيىم ءوز سايتىندا بۇل شارالار تۋرالى اقپارات جاريالاپ، جاستاردى بەيبىت شەرۋگە قاتىسۋعا شاقىرعان.
