وزبەكستان پرەزيدەنتى شاۆكات ميرزيوەۆ شەتەلدە تاجىريبە جيناعان دارىگەرلەردى ىنتالاندىرۋ جۇيەسى ەنگىزىلەتىنىن مالىمدەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ەلگە ورالعان ماماندارعا جۇمىسقا ورنالاسۋعا كەپىلدىك بەرىلىپ، اي سايىن 50 ملن سۋمعا دەيىن (4 مىڭ دوللاردان استام) جالاقى ۇستەماقىسى تولەنەدى. سونىمەن قاتار ولارعا ءوز كومانداسىنا مامانداردى دەربەس ىرىكتەۋ مۇمكىندىگى بەرىلەدى.
مەملەكەت باسشىسى دەنساۋلىق ساقتاۋ جانە فارماتسەۆتيكا سالاسىنىڭ قىزمەتكەرلەرىمەن كەزدەسۋدە جەرگىلىكتى مەديتسينا ماماندارىن قولداۋ شارالارىن دا اتاپ ءوتتى. اتاپ ايتقاندا، كەمىندە 15 جىل ەڭبەك ءوتىلى بار قىزمەتكەرلەردىڭ يپوتەكالىق نەسيەسىن ءىشىنارا وتەۋگە مەملەكەت 50 ملرد سۋم (4,1 ملن دوللار) بولەدى. سونىڭ ارقاسىندا كەلەسى جىلدىڭ وزىندە مىڭ مامان جاڭا باسپاناعا كوشەدى. سونداي-اق جىل سايىن 500 جاس دارىگەردىڭ باسپانا ساتىپ الۋ ءۇشىن العان نەسيەسى بويىنشا باستاپقى جارنانىڭ 25 پايىزىنا دەيىنگى بولىگى وتەلمەك.
پرەزيدەنت شالعاي اۋدانداردا جۇمىس ىستەيتىن ماماندارعا 4,5 ملن سۋمعا دەيىن (375 دوللار) ۇستەماقى تولەنەتىنىن دە ايتتى. بۇعان قوسا، ولارعا 50 ملن سۋم (4 مىڭ دوللاردان استام) كولەمىندە بىرجولعى تولەم بەرىلەدى.
شاۆكات ميرزيوەۆتىڭ ايتۋىنشا، سوڭعى 10 جىلدا 10 ملن ادامعا قىزمەت كورسەتۋگە ارنالعان جاڭا ەمحانالار مەن اۋرۋحانالار پايدالانۋعا بەرىلىپ، 58 مىڭ توسەك-ورىن جاساقتالعان. قازىر وزبەكستاندا بۇرىن تەك شەتەلدە قولجەتىمدى بولعان مەديتسينالىق قىزمەتتىڭ 100-دەن استام ءتۇرى كورسەتىلەدى. ولاردىڭ قاتارىندا جۇرەكتىڭ تۋا بىتكەن اقاۋلارىن ەمدەۋ، اعزا ترانسپلانتاتسياسى، روبوتتاندىرىلعان جانە كۇردەلى نەيروحيرۋرگيالىق وپەراتسيالار بار.
پرەزيدەنت ءدارى-دارمەككە دەگەن حالىق سۇرانىسىنىڭ 70 پايىزىن وتاندىق ءوندىرىس ەسەبىنەن قامتاماسىز ەتۋ جوسپارلانىپ وتىرعانىن مالىمدەدى. ونىڭ سوزىنشە، سوڭعى ۋاقىتتا جالپى قۇنى 1 ملرد دوللار بولاتىن 330 جاڭا وندىرىستىك نىسان ىسكە قوسىلعان. سونىمەن قاتار وڭىرلەردە فارماتسەۆتيكالىق ەركىن ەكونوميكالىق ايماقتار قۇرىلىپ، وندا جالپى قۇنى 1,2 ملرد دوللار بولاتىن جوبالار جۇزەگە اسىرىلىپ جاتىر.
بۇدان بولەك، ەلدە ۇزدىك دارىگەر مەن ۇزدىك مەيىرگەردى انىقتايتىن بايقاۋلاردىڭ جەڭىمپازدارىن ىنتالاندىرۋ تاجىريبەسى كەڭەيتىلەدى. اتاپ ايتقاندا، ەرەكشە كوزگە تۇسكەن ماماندارعا ەلەكتروموبيلدەر تابىستالادى. سونداي-اق سالاۋاتتى ءومىر سالتىن ناسيحاتتاۋعا ارنالعان ۇزدىك 10 جوبانىڭ اۆتورىنا ارقايسىسىنا 200 ملن سۋمنان (16,7 مىڭ دوللار) گرانت بەرىلەدى.
