وزبەكستاننىڭ «ميللي تيكلانيش» (ۇلتتىق جاڭعىرۋ) پارتياسىنىڭ جەتەكشىسى اليشەر قادىروۆ ەلدەگى بارلىق سىرتقى جارنامالار مەن جازۋلاردى مەملەكەتتىك تىلدە، ياعني وزبەك تىلىندە جازۋ قاجەتتىگىن مالىمدەدى. بۇل تۋرالى ول ءوزىنىڭ Telegram-ارناسىندا جازدى، دەپ حابارلايدى “ادىرنا” ۇلتتىق پورتالى.
«تاشكەنتتەن باستالعان بارلىق قالاداعى سىرتقى جارنامالار، حابارلامالار مەن كورسەتكىشتەر باسقا تىلدەردە، ءتىپتى باسقا الفاۆيتتەرمەن جازىلعانى كوپ جاعدايدا بايقالادى. بۇل — ۇلكەن ماسەلە»، - دەپ اتاپ ءوتتى ساياساتكەر.
دەپۋتاتتىڭ ايتۋىنشا، جارنامالار مەن كورسەتكىشتەر تەك وزبەك تىلىندە بولۋى ءتيىس، ال قاجەت بولعان جاعدايدا ولاردى باسقا تىلدەرمەن قوسا جازۋعا بولادى.
ول «ميللي تيكلانيش» پارتياسى «سىرتقى جازۋلار تۋرالى» زاڭ جوباسى بويىنشا جۇمىس باستاعانىن ايتتى. ونىڭ پىكىرىنشە، وزبەك تىلىنە دەگەن كوزقاراس تۇبەگەيلى وزگەرۋى كەرەك.
«اسىرەسە كاسىپكەرلەر مەن مەملەكەتتىك ورگاندار وزبەك ءتىلىن قۇرمەتتەپ، زاڭدى ساقتاۋدىڭ ۇلگىسىن كورسەتۋى ءتيىس. قوعام دا وسى ماسەلەدە ءپرينتسيپتى بولۋى قاجەت»، — دەدى قادىروۆ.
