اتىراۋ وبلىسىندا شەنەۋنىك باۋىرجان اسايىنوۆتىڭ ولىمىنە بايلانىستى قىلمىستىق ءىس قوزعالدى، دەپ حابارلايدى “ادىرنا”.
“اق جايىق” دەرەگىنشە، ول الەۋمەتتىك قورعاۋ سالاسىن رەتتەۋ جانە باقىلاۋ كوميتەتىنىڭ وڭىرلىك دەپارتامەنتىن باسقارعان.
اسايىنوۆتىڭ قايتىس بولعانى تۋرالى اقپارات دەپارتامەنتتىڭ Instagram الەۋمەتتىك جەلىسىندەگى پاراقشاسىندا جاريالاندى. وندا مارقۇمنىڭ جاۋاپتى قىزمەت اتقارىپ، وزىنە جۇكتەلگەن مىندەتتەردى ورىنداۋعا كۇش سالعانى ايتىلعان.
«ونىڭ كۇتپەگەن جەردەن قايتىس بولۋى — ارىپتەستەرى مەن جاقىندارى ءۇشىن ورنى تولماس قازا»، — دەلىنگەن حابارلامادا.
«اق جايىق» باسىلىمىنىڭ مالىمەتىنشە، شەنەۋنىكتىڭ دەنەسى 18 قازاندا ءوزى تۇرعان پاتەردەن تابىلعان. الدىن الا بولجام بويىنشا، ءمايىت تابىلعانعا دەيىن پاتەردە شامامەن ەكى اپتا جاتقان.
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان دەرەك بويىنشا قىلمىستىق ءىس قوزعالعانىن راستادى.
«اتالعان فاكتى بويىنشا قىلمىستىق ءىس قوزعالدى. قازىرگى ۋاقىتتا كەشەندى تەرگەۋ شارالارى جۇرگىزىلىپ جاتىر. تەرگەۋ مۇددەسىنە بايلانىستى وزگە اقپارات جاريا ەتىلمەيدى»، — دەپ حابارلادى پوليتسيا.
