بۇرىنعى ۇقك توراعاسى كارىم ءماسىموۆتىڭ قاي وڭىردەگى تۇزەۋ مەكەمەسىندە جازاسىن وتەپ جاتقانى، تۇرمەدە جۇمىس ىستەيتىنى جانە قانداي كىتاپتار وقيتىنى بەلگىسىز، دەپ حابارلايدى “ادىرنا”.
كۋرسيۆ دەرەگىنشە، قىلمىستىق-اتقارۋ جۇيەسى كوميتەتى بۇل مالىمەتتەردى جاريالاۋدان باس تارتقان.
رەداكتسيا قىلمىستىق-اتقارۋ جۇيەسى كوميتەتىنە رەسمي ساۋال جولداپ، ءماسىموۆتىڭ ەڭبەك قىزمەتى، جالاقىسى، كىتاپ وقۋى جانە قاماۋدا ۇستاۋ جاعدايلارىنا قاتىستى شاعىمدارى تۋرالى اقپارات سۇراعان.
الايدا كوميتەت سوتتالعان ادامنىڭ جەكە دەرەكتەرىن قورعاۋ تالاپتارىنا سۇيەنىپ، ساۋالداعى سۇراقتاردىڭ باسىم بولىگىنە جاۋاپ بەرمەگەن. قاجك توراعاسىنىڭ ورىنباسارى سەرگەي ۆارگو بۇرىنعى ۇقك باسشىسىنىڭ ناقتى قاي مەكەمەدە جانە قاي وڭىردە جازاسىن وتەپ جاتقانىن اشىپ ايتپاعانىمەن، ونىڭ قىلمىستىق-اتقارۋ جۇيەسى مەكەمەسىندە وتىرعانىن راستاعان.
«ساۋالدا كورسەتىلگەن سوتتالعان ادام زاڭدى كۇشىنە ەنگەن سوت اكتىلەرىنە سايكەس قىلمىستىق-اتقارۋ جۇيەسىنىڭ مەكەمەسىندە جازاسىن وتەپ جاتىر»، – دەلىنگەن كوميتەت جاۋابىندا.
بۇدان بولەك، باسىلىم ءماسىموۆتىڭ جاڭا ماماندىق مەڭگەرگەن-مەڭگەرمەگەنىن، 2025–2026 جىلدارى مەديتسينالىق كومەككە جۇگىنگەنىن، تارتىپتىك جازا نەمەسە كوتەرمەلەۋ العانىن سۇراعان. سونداي-اق سوڭعى ءبىر جارىم جىلدا تۋىستارىمەن قانشا رەت كەزدەسكەنى جانە قانشا سالەمدەمە العانى تۋرالى مالىمەت سۇراتقان. الايدا بۇل سۇراقتارعا دا جاۋاپ بەرىلمەگەن.
كوميتەت سوتتالعانداردىڭ جەكە ىستەرىندەگى مالىمەتتەر قۇپيا سانالاتىنىن جانە جاريالاۋعا جاتپايتىنىن مالىمدەگەن. ۆەدومستۆو بۇل ۇستانىمىن «دەربەس دەرەكتەر جانە ولاردى قورعاۋ تۋرالى» زاڭ مەن قىلمىستىق-اتقارۋ كودەكسىنىڭ تالاپتارىمەن ءتۇسىندىردى. قولدانىستاعى تارتىپكە سايكەس، سوتتالعان ادامنىڭ قاي مەكەمەدە جازاسىن وتەپ جاتقانى تۋرالى اقپارات ونىڭ جاقىن تۋىستارىنا بەرىلەدى.
2026 جىلعى تامىزدا كارىم ءماسىموۆتىڭ قازاقستاننان كەتىپ، اقش-تىڭ حيۋستون قالاسىندا وتباسىمەن بىرگە تۇرىپ جاتقانى تۋرالى اقپارات تاراعان ەدى. سۋرەتشى قانات يبراگيموۆ وزگە ادامداردان ەستىگەن مالىمەتتەرگە سۇيەنىپ، بۇرىنعى ۇقك توراعاسىنىڭ بوستاندىققا شىققانىن ايتقان. الايدا ءىىم بۇل اقپاراتتى جوققا شىعاردى. مينيسترلىك قاجك مەكەمەلەرىندە تاۋلىك بويى بەينەباقىلاۋ جۇرگىزىلىپ، تۇراقتى تەكسەرۋلەر ۇيىمداستىرىلاتىنىن حابارلاعان.
ەسكە سالايىق، 2023 جىلعى 24 ساۋىردە كارىم ءماسىموۆ قاڭتار وقيعاسىنا قاتىستى ءىس بويىنشا 18 جىلعا باس بوستاندىعىنان ايىرىلدى. سوت ونى مەملەكەتكە وپاسىزدىق جاساۋ، بيلىكتى كۇشپەن باسىپ الۋعا ارەكەتتەنۋ جانە لاۋازىمدىق وكىلەتتىكتەرىن اسىرا پايدالانۋ باپتارى بويىنشا كىنالى دەپ تانىدى. سونىمەن قاتار ونىڭ مۇلكى تاركىلەنىپ، مەملەكەتتىك قىزمەتتە لاۋازىم اتقارۋىنا ءومىر بويىنا تىيىم سالىندى.
