Būrynǧy ŪQK töraǧasy Kärım Mäsımovtıŋ qai öŋırdegı tüzeu mekemesınde jazasyn ötep jatqany, türmede jūmys ısteitını jäne qandai kıtaptar oqityny belgısız, dep habarlaidy “Adyrna”.
Kursiv deregınşe, Qylmystyq-atqaru jüiesı komitetı būl mälımetterdı jariialaudan bas tartqan.
Redaksiia Qylmystyq-atqaru jüiesı komitetıne resmi saual joldap, Mäsımovtıŋ eŋbek qyzmetı, jalaqysy, kıtap oquy jäne qamauda ūstau jaǧdailaryna qatysty şaǧymdary turaly aqparat sūraǧan.
Alaida komitet sottalǧan adamnyŋ jeke derekterın qorǧau talaptaryna süienıp, saualdaǧy sūraqtardyŋ basym bölıgıne jauap bermegen. QAJK töraǧasynyŋ orynbasary Sergei Vargo būrynǧy ŪQK basşysynyŋ naqty qai mekemede jäne qai öŋırde jazasyn ötep jatqanyn aşyp aitpaǧanymen, onyŋ qylmystyq-atqaru jüiesı mekemesınde otyrǧanyn rastaǧan.
«Saualda körsetılgen sottalǧan adam zaŋdy küşıne engen sot aktılerıne säikes qylmystyq-atqaru jüiesınıŋ mekemesınde jazasyn ötep jatyr», – delıngen komitet jauabynda.
Būdan bölek, basylym Mäsımovtıŋ jaŋa mamandyq meŋgergen-meŋgermegenın, 2025–2026 jyldary medisinalyq kömekke jügıngenın, tärtıptık jaza nemese kötermeleu alǧanyn sūraǧan. Sondai-aq soŋǧy bır jarym jylda tuystarymen qanşa ret kezdeskenı jäne qanşa sälemdeme alǧany turaly mälımet sūratqan. Alaida būl sūraqtarǧa da jauap berılmegen.
Komitet sottalǧandardyŋ jeke ısterındegı mälımetter qūpiia sanalatynyn jäne jariialauǧa jatpaitynyn mälımdegen. Vedomstvo būl ūstanymyn «Derbes derekter jäne olardy qorǧau turaly» zaŋ men Qylmystyq-atqaru kodeksınıŋ talaptarymen tüsındırdı. Qoldanystaǧy tärtıpke säikes, sottalǧan adamnyŋ qai mekemede jazasyn ötep jatqany turaly aqparat onyŋ jaqyn tuystaryna berıledı.
2026 jylǧy tamyzda Kärım Mäsımovtıŋ Qazaqstannan ketıp, AQŞ-tyŋ Hiuston qalasynda otbasymen bırge tūryp jatqany turaly aqparat taraǧan edı. Suretşı Qanat İbragimov özge adamdardan estıgen mälımetterge süienıp, būrynǧy ŪQK töraǧasynyŋ bostandyqqa şyqqanyn aitqan. Alaida IIM būl aqparatty joqqa şyǧardy. Ministrlık QAJK mekemelerınde täulık boiy beinebaqylau jürgızılıp, tūraqty tekseruler ūiymdastyrylatynyn habarlaǧan.
Eske salaiyq, 2023 jylǧy 24 säuırde Kärım Mäsımov Qaŋtar oqiǧasyna qatysty ıs boiynşa 18 jylǧa bas bostandyǧynan aiyryldy. Sot ony memleketke opasyzdyq jasau, bilıktı küşpen basyp aluǧa ärekettenu jäne lauazymdyq ökılettıkterın asyra paidalanu baptary boiynşa kınälı dep tanydy. Sonymen qatar onyŋ mülkı tärkılenıp, memlekettık qyzmette lauazym atqaruyna ömır boiyna tyiym salyndy.
