ۇلتتىق قاۋىپسىزدىك كوميتەتى شىعىس قازاقستان وبلىستىق ءماسليحاتىنىڭ دەپۋتاتى دميتري سوموۆقا قاتىستى تەرگەۋ ءجۇرىپ جاتقانىن راستادى، دەپ حابارلايدى "ادىرنا" ۇلتتىق پورتالى Politico.kz سايتىنا سىلتەپ.
بيىلعى جىلدىڭ اقپان ايىنىڭ ورتاسىندا دەپۋتاتتىڭ لاۋازىمدى تۇلعاعا پارا بەردى دەگەن كۇدىكپەن ۇستالعانى جايلى اقپاراتقا ۇقك جاۋاپ بەردى.
«سوتقا دەيىنگى تەرگەپ-تەكسەرۋ جۇرگىزىلىپ جاتقانىن حابارلايمىز. قىلمىستىق-پروتسەستىك كودەكستىڭ 201-بابىنىڭ 1-تارماعىنا سايكەس وزگە اقپارات جاريا ەتۋگە جاتپايدى»، – دەلىنگەن Politico.kz-ءتىڭ ساۋالىنا بەرگەن رەسمي جاۋاپتا.
قازىرگى ۋاقىتتا «قازاۆتوجول» ۇلتتىق كومپانياسى ۇستالعان دەپۋتاتتىڭ قۇرىلتايشىلىعىنداعى «ۆوستوكۆزرىۆپروم» سەرىكتەستىگىن سوتقا بەرىپ، جۇمىستاردى اياقتاۋدى جانە ايىپپۇل ءوندىرۋدى تالاپ ەتىپ جاتىر. مەملەكەتتىك ساتىپ الۋ سايتىنىڭ مالىمەتىنشە، دەپۋتات پەن ونىڭ جۇبايى ەلەنا سوموۆا باسقاراتىن بۇل كومپانيا وبلىستاعى قۇرىلىس پەن كوممۋنالدىق سالادا ءىرى تەندەرلەردى ۇتىپ كەلگەن. ماسەلەن 2024 جىلى اتالعان مەكەمە «قازاۆتوجول» اكتسيونەرلىك قوعامىمەن رەسپۋبليكالىق ماڭىزى بار جولداردى جوندەۋگە جالپى سوماسى 24,3 ميلليارد تەڭگەدەن اساتىن بىرنەشە كەلىسىمشارت جاساسقان. كەلىسىمشارتتاردىڭ باسىم بولىگىنىڭ مارتەبەسى ءالى دە كۇشىندە بولعانىمەن، ناقتى قاي جوبا بويىنشا داۋ تۋىنداعانى ازىرگە بەلگىسىز.
جۋرناليست دميتري شيشكين 2024 جىلى دميتري سوموۆتىڭ 9 كومپانيانىڭ قۇرىلتايشىسى ەكەنىن جانە ونىڭ ەڭ ءىرى مەكەمەسى قوماقتى مەملەكەتتىك تاپسىرىستار الاتىنىن جازعان بولاتىن. سونىمەن قاتار جەمقورلىقتى زەرتتەۋ قور-بيۋروسى وسكەمەندەگى ونەركاسىپتىك-ازاماتتىق قۇرىلىس سالاسىنداعى ءىرى تەندەرلەر ءوزارا ۇلەستەس «ۆوستوكۆزرىۆپروم» مەن «Kurylys Group RK» سەرىكتەستىكتەرى اراسىندا ويناتىلاتىنىن انىقتادى. بۇل ۇيىمدار باسەكەلەستىكتى جويۋ ماقساتىندا بيزنەستى ادەيى بولشەكتەپ، ءبىر-بىرىنە جالعان قارسىلاس رەتىندە قاتىسۋى ارقىلى قۇرىلىس بايقاۋلارىندا جەڭىسكە جەتىپ وتىرعان. ەكى كومپانيانىڭ باسشىلارى دميتري سوموۆ پەن الەكساندر اندرەيچۋك باسقا دا سەرىكتەستىكتەردە ورتاق سەرىكتەس بولىپ تابىلادى.
اتالعان كومپانيالاردىڭ جۇمىس ساپاسى مەن تاپسىرىستاردى الۋ زاڭدىلىعىنا قاتىستى جەرگىلىكتى جۇرتشىلىق بىرنەشە رەت شاعىمدانعان. بۇعان دەيىن «توپاز» كومپانياسىنىڭ ديرەكتورى بولات باعاداەۆ «ۆوستوكۆزرىۆپروم» سەرىكتەستىگىندە قاجەتتى تەحنيكا مەن مامانداردىڭ جوقتىعىنا قاراماستان بايقاۋلاردا جەڭىسكە جەتەتىنىن ايتقان ەدى. ۇزاققا سوزىلعان سوت پروتسەستەرىنىڭ ناتيجەسىندە بۇل ەكى مەكەمە دە ءار جىلدارى مەملەكەتتىك ساتىپ الۋدىڭ جوسىقسىز قاتىسۋشىسى دەپ تانىلعانىنا قاراماستان، رەپۋتاتسيالىق شىعىنعا ۇشىراماي، ءىرى مەملەكەتتىك جوبالاردى الۋىن توقتاتپاعان.
ايتا كەتەرلىگى، جاقىندا عانا وسى وڭىردە وبلىس اكىمىنىڭ ءبىرىنشى ورىنباسارى جاقسىلىق وماردىڭ دا ۇستالعانى تۋرالى اقپاراتتى ۇقك راستاعان بولاتىن
