قازاقستاننىڭ جاساندى ينتەللەكت سالاسىندا ەرەكشە جادىگەر پايدا بولدى. «قازاقتەلەكوم» باسقارما توراعاسى باعدات مۋسين NVIDIA كومپانياسىنىڭ نەگىزىن قالاۋشى ءارى باس ديرەكتورى دجەنسەن حۋانگقا قولدان جاسالعان قارا بىلعارى كۇرتە سىيلادى، دەپ حابارلايدى “ادىرنا”.
دجەنسەن حۋانگتىڭ قارا بىلعارى كۇرتەسى ونىڭ وزىندىك ءستيلىنىڭ اجىراماس بولىگىنە اينالعان. وسى ەرەكشەلىكتى ەسكەرگەن باعدات مۋسين وعان ارنايى قولونەرمەن جاسالعان كۇرتە سىيلاۋدى ۇيعارعان.
الايدا دجەنسەن حۋانگ سىيلىقتى قابىلداۋدىڭ ورنىنا كۇتپەگەن ۇسىنىس جاساعان. ول كۇرتەگە قولتاڭباسىن قويىپ، ونى ەستەلىك رەتىندە قالدىرۋدى ۇسىنعان.
وسىلايشا، قازاقستاننىڭ AI سالاسىندا الەمدىك تەحنولوگيا يندۋسترياسىنىڭ ىقپالدى تۇلعالارىنىڭ ءبىرى دجەنسەن حۋانگتىڭ قولتاڭباسى قويىلعان ەرەكشە جادىگەر پايدا بولدى.
كۇرتەنى “Damys” برەندى تازا بىلعارىدان دايىنداعان. بۇيىمنىڭ ديزاينىندا ۇلتتىق ناقىشقا ەرەكشە ءمان بەرىلگەن. اتاپ ايتقاندا، كۇرتەنىڭ يىق تۇسىندا قوشقار ءمۇيىز جانە بۇركىت تاڭبالى ويۋلار بار. ال ىشكى جاعىندا «ۇلى دالا سىيلىعى» دەگەن جازۋ ورنالاسقان. كۇرتەنىڭ تۇيمەلەرى دە كۇمىستەن جاسالعان.
وسىلايشا، ۇلتتىق ويۋ-ورنەك، ءداستۇرلى ماتەريالدار مەن زاماناۋي ديزاين ۇيلەسىم تاپقان ەرەكشە بۇيىم قازاقستاننىڭ جاساندى ينتەللەكت سالاسىنا قاتىستى ەستە قالارلىق جادىگەرگە اينالدى.
كۇرتە ازىرگە بىرەۋ بولعانىمەن، قازاقستاننىڭ AI سالاسىنداعى اۋقىمدى جوبالارى مەن ەسەپتەۋ قۋاتتارىن دامىتۋعا دەگەن امبيتسياسى ودان الدەقايدا ۇلكەن. ويتكەنى ءىرى تەحنولوگيالىق باستامالار باتىل يدەيالاردان باستالسا، كەيدە ولاردى ەستە قالدىراتىن ەرەكشە ستيل دە بولادى.
