3 قاراشا كۇنى تۇركى مەملەكەتتەرى ۇيىمىنىڭ ونىنشى سامميتىنە كەلگەن تۇركيا پرەزيدەنتى رەجەپ تايىپ ەردوعان قازاقستان پرەزيدەنتى قاسىم-جومارت توقاەۆقا Togg T10X ەلەكتروموبيلىن سىيلاعان بولاتىن. مەملەكەت باسشىسىنا سىيلانعان قانداي كولىك؟ بۇل تۋرالى kolesa.kz جازدى، دەپ حابارلايدى “ادىرنا” ۇلتتىق پورتالى.
Togg — تۇرىكتىڭ ۇلتتىق اۆتوموبيل برەندى. جوبانى بىرنەشە كومپانيا 2017 جىلى قولعا العان. اراسىندا ءتىپتى سىرا قايناتاتىن Anadolu Group كومپانياسى بار ەكەن. ماشينانىڭ العاشقى كونتسەپتىسىن 2019 جىلى Pininfarina اتەلەسى جاسادى. زاۋىت قۇرىلىسى دا سول كەزدە باستالدى. تۇركيا بۇل مودەلدى بىلتىر قاراشادا رەسمي شىعارا باستاعان.
باسىلىمنىڭ مالىمەتىنشە، توقاەۆ T10X-ءتىڭ ءدال قاي نۇسقاسىن العانى بەلگىسىز، دەگەنمەن ماشينا جالپى 430 ات كۇشىن بەرەتىن ەكى ەلەكتروموتورمەن جانە 88.5 كۆت·ساع باتارەيا بلوگىمەن جۇمىس ىستەيتىن، جاقسى جابدىقتالعان ءتۇرى. ويتكەنى ودان بولەك توپتامادا 210 ات كۇشىنە يە ءبىر موتورمەن جابدىقتالعان كولىك قانا بار. T10X-ءتىڭ ءجۇرىس قورى 314-523 شاقىرىمعا جەتەدى.
ايتا كەتەيىك، قاسىم-جومارت توقاەۆ ەردوعاننان Togg T10X العان العاشقى پرەزيدەنت ەمەس. تۇركيا باسشىسى بۇعان دەيىن كاتار ءامىرى مەن ءازىربايجان، وزبەكستان باسشىلارىنا وسىنداي كولىك سىيلاعان.
