Қазақстанның жасанды интеллект саласында ерекше жәдігер пайда болды. «Қазақтелеком» басқарма төрағасы Бағдат Мусин NVIDIA компаниясының негізін қалаушы әрі бас директоры Дженсен Хуангқа қолдан жасалған қара былғары күрте сыйлады, деп хабарлайды “Адырна”.
Дженсен Хуангтың қара былғары күртесі оның өзіндік стилінің ажырамас бөлігіне айналған. Осы ерекшелікті ескерген Бағдат Мусин оған арнайы қолөнермен жасалған күрте сыйлауды ұйғарған.
Алайда Дженсен Хуанг сыйлықты қабылдаудың орнына күтпеген ұсыныс жасаған. Ол күртеге қолтаңбасын қойып, оны естелік ретінде қалдыруды ұсынған.
Осылайша, Қазақстанның AI саласында әлемдік технология индустриясының ықпалды тұлғаларының бірі Дженсен Хуангтың қолтаңбасы қойылған ерекше жәдігер пайда болды.
Күртені “Damys” бренді таза былғарыдан дайындаған. Бұйымның дизайнында ұлттық нақышқа ерекше мән берілген. Атап айтқанда, күртенің иық тұсында қошқар мүйіз және бүркіт таңбалы оюлар бар. Ал ішкі жағында «Ұлы дала сыйлығы» деген жазу орналасқан. Күртенің түймелері де күмістен жасалған.
Осылайша, ұлттық ою-өрнек, дәстүрлі материалдар мен заманауи дизайн үйлесім тапқан ерекше бұйым Қазақстанның жасанды интеллект саласына қатысты есте қаларлық жәдігерге айналды.
Күрте әзірге біреу болғанымен, Қазақстанның AI саласындағы ауқымды жобалары мен есептеу қуаттарын дамытуға деген амбициясы одан әлдеқайда үлкен. Өйткені ірі технологиялық бастамалар батыл идеялардан басталса, кейде оларды есте қалдыратын ерекше стиль де болады.
