Ūlytau oblysynyŋ äkımdıgı men «Otbasy bank» jyl saiyn tūrǧyn üi baǧdarlamalaryn qarjylandyruǧa 3 mlrd teŋgeden baǧyttaidy.
Bügın Respublika künı qarsaŋynda oblys äkımı Eset Baiken men «Otbasy bank» basqarma töraiymy Läzzat İbragimova 2027–2029 jyldarǧa arnalǧan yntymaqtastyq turaly memorandumǧa qol qoidy.
Jaŋa «Ūlytau baspana» öŋırlık baǧdarlamasy aiasynda bastapqy jarnasy 10%-dan bastalatyn, jyldyq syiaqy mölşerlemesı 5% bolatyn tūrǧyn üi zaemdaryn beru josparlanyp otyr. Qarjynyŋ 2,5 mlrd teŋgesın jyl saiyn «Otbasy bank», al 500 mln teŋgesın oblys äkımdıgı böledı.
Oblys äkımı Eset Baikennıŋ aituynşa, baǧdarlama tūrǧyn üi qoryn jaŋartuǧa, baspana kezegın qysqartuǧa jäne öŋır tūrǧyndarynyŋ jeke baspana alu mümkındıgın keŋeituge baǧyttalǧan.
«Otbasy bankpen bırlesken jūmysty jaŋa deŋgeige köterıp, öŋır tūrǧyndary üşın qosymşa mümkındıkter aşudy közdep otyrmyz. «Ūlytau baspana» baǧdarlamasynyŋ erekşelıgı – ony jüzege asyruǧa ırı jäne orta biznes ökılderı de qatysyp, öz qyzmetkerlerınıŋ tūrǧyn üi jaǧdaiyn jaqsartuǧa üles qosa alady. Qazırdıŋ özınde alǧaşqy äleuettı serıktester jobany qoldauǧa daiyn ekenın bıldırdı.
Bız üşın jūmysşy mamandyqtarynyŋ ökılderıne, äleumettık sala qyzmetkerlerıne jäne öndırıs oryndarynyŋ mamandaryna baspana aluǧa mümkındık jasau maŋyzdy. Adamdardyŋ tuǧan jerınde qalyp, eŋbek etıp, otbasyn qūryp, bolaşaǧyn Ūlytau öŋırımen bailanystyruy üşın qajettı jaǧdai jasauymyz kerek», – dedı Eset Baiken.
Öŋırde bırlesken tūrǧyn üi baǧdarlamalaryn jüzege asyru täjıribesı bar. Üş jyl ışınde «Ūlytau jastary» baǧdarlamasy boiynşa 137 jas baspanaly boldy. Al 2025 jyly ıske qosylǧan «Sätbaev jūmysker» jobasy aiasynda Sätbaev qalasynyŋ 15 tūrǧyny päter aldy. Atalǧan baǧdarlamalarǧa bölıngen qarjynyŋ jalpy kölemı 2,6 mlrd teŋgenı qūrady.
Būdan bölek, «Otbasy banktıŋ» qoldauymen tūrǧyn üige mūqtaj azamattar esebınde tūrǧan 429 adam baspanamen qamtyldy.
Bügın Respublika künı qarsaŋynda Jezqazǧan jäne Sätbaev qalalarynyŋ tūrǧyndary da jaŋa päterlerdıŋ kıltın aldy. Oblys äkımı Eset Baiken men «Otbasy bank» basqarma töraiymy Läzzat İbragimova jaŋa qonys ielerın quanyşymen qūttyqtap, şaŋyraqtaryna baq-bereke, qūt-yrys pen otbasylyq baqyt tıledı.
«Ūlytau baspana» baǧdarlamasynyŋ ıske qosyluy tūrǧyn üige qoldau körsetu tetıkterın keŋeitıp, öŋırdegı jūmysşylardy baspanamen qamtuǧa biznestı tartuǧa mümkındık beredı.
